Fjölskyldur og vinir fjögurra háskólastúdenta sem létust í flugslysi á Öxnadalsheiði árið 1958, hyggjast koma upp minnisvarða um fjórmenningana á heiðinni í sumar.
Piltarnir sem létust voru Bragi Egilsson frá Hléskógum í Höfðahverfi, Geir Geirsson frá Djúpavogi, Reykvíkingurinn Jóhann G. Möller og Ragnar Friðrik Ragnars frá Siglufirði.
Í texta frá aðstandendum og vinum fjórmenninganna segir orðrétt:
65 ÁR LIÐIN FRÁ FLUGSLYSI Á ÖXNADALSHEIÐI
Síðla dags 29. mars 1958 lögðu fjórir háskólastúdentar upp frá Reykjavík fjögurra sæta flugvél af gerðinni Cessna 172. Ferðinni var heitið til Akureyrar þar sem þeir hugðust heimsækja góða vini og gamla skólann sinn, Menntaskólann á Akureyri, en þaðan höfðu þeir allir lokið stúdentsprófi ári áður. Þeir voru: Bragi Egilsson, Geir Geirsson, Jóhann G. Möller og Ragnar Friðrik Ragnars.
Áætlar var að lenda á Akureyrarflugvelli um kl. 19:00. Veður versnaði er leið á flugið og lauk ferðinni þannig að flugvélin brotlenti á Öxnadalsheiði, skammt fyrir ofan Bakkasel. Þar lauk ævi þessara ungu, efnilegu manna.
Ekki þarf að orðlengja það, að mikill harmur var kveðinn að fjölskyldum og vinum. Aðstandendur og vinir hyggjast nú reisa þeim veglegan minnisvarða á heiðinni og er stefnt að afhjúpun hans þann um 20. ágúst n.k.
Nokkur kostnaður fylgir gerð minnisvarðans. Hafin er fjársöfnun til þess að standa straum af honum. Öllum sem leggja vilja málinu lið er boðið að taka þátt í verkefninu.
Stofnaður hefur verið reikningur vegna söfnunarinnar í Sparisjóði Höfðhverfinga. Reikningsnúmerið er 1187 – 05 – 252550. Kennitala er 251059 – 3819, á nafni Braga Björgvinssonar.
Fyrirfram þakkir til þeirra sem styðja við þetta framtak. Margt smátt gerir eitt stórt.
Fyrir hönd aðstandenda,
Laufey Egilsdóttir
Guðrún Ragnars
Athugasemdir