Ofbeldismaður fór um miðborgina í nótt og ógnaði blásaklausu fólki. Lögreglan mætti á vettvang og handtók manninn þar sem hann var til alls vís . Óróaseggurinn var fluttur á lögreglustöð en hegðun hans reynist vera óútreiknanleg. Hann var með ógnandi tilburði í garð lögreglu og „bölvaði lögreglumönnum í sand og ösku“ eins og segir í dagbók lögreglunnar. Maðurinn fékk ítrekað tækifæri til þess að gera grein fyrir því hver hann væri með því að gefa upp nafn og kennitölu. Hann neitaði að upplýsa lögreglumenn um hver hann væri. Varðstjóri tók því ákvörðun um að læsa þann nafnlausa inni í fangaklefa. Hann svarar til saka í morgunsárið.
Seinheppinn þjófur var staðinn að verki við innbrot í skóla í miðborginni. Vitni sjá skólaþjófinn bera muni út úr skólanum og ferja þá á brott. Lögregla fór á vettvang og ræddi við vitnið. Þjófurinn hafði reynt að stela sorptunnu fyrir utan heimili í nálægð við skólann til að flytja þýfið. Lögreglan fékk greinagóða lýsingu á þjófinum og skoðaði myndskeið sem tekin voru af honum við iðju sína. Við leit í hverfinu fannst innbrotsþjófurinn sem tók þá á rás og lagði á flótta undan lögreglunn. Við það hófst eftirför á fæti um hverfið. Lögreglumennirnir reyndust vera snarpari og hlupu þeir þjófinn uppi og handtóku hann. Hann var fluttur á lögreglustöð þar sem hann var vistaður í fangaklefa rétt eins og nafnlausi ofbeldismaðurinn.
Ökumaður var stöðvaður eftir að hafa mælst á 133 kílómetra hraða á vegkafla þar sem hámarkshraði er 80 kílómetrar. Ökumaðurinn viðurkenndi brot sitt greiðlega og fær sekt upp á 90 þúsund krónur að minnsta kosti.
Athugasemdir