Brynjar vill gamla Bjarna Ben aftur: „For­yst­an þarf að tala fyr­ir stefnu­mál­um flokks­ins“

Brynjar Níelsson hefur áhyggjur af stöðu Sjálf­stæð­is­flokks­ins og fram­tíð hans

„Ég ótt­ast að það geti gerst. Ég finn mikla undir­öldu,“ sagði Brynj­ar Ní­els­son, fyrr­ver­andi þing­maður Sjálf­stæðis­flokks­ins, í sam­tali við Morg­un­blaðið varð­andi hvort að það sé klofn­ingur í flokknum. 

Í gær var greint frá því að Sjálf­stæð­is­flokk­ur­inn mælist með sögu­lega lágt fylgi í nýrri könnun sem fyr­ir­tækið Prósent gerði. Þar mæld­ist flokk­ur­inn aðeins með 16,1% fylgi og þykir ljóst að nái flokk­ur­inn ekki betri árangri í næstu Alþing­is­kosn­ingum yrði það mik­ill skellur fyrir Sjálf­stæð­is­menn. Brynjar vill meina að for­ysta flokks­ins þurfi að vera skýr­ari og berj­ast meira fyrir málum sem flokk­ur­inn stendur fyrir.

„Mönn­um finnst framá­menn flokks­ins ekki tala nógu mikið fyr­ir stefn­unni og stefnu­mál­um sín­um. Við erum í rík­is­stjórn­ar­sam­starfi og það kall­ar á mála­miðlan­ir. All­ir skilja það. Það breyt­ir ekki því að for­yst­an þarf að tala fyr­ir stefnu­mál­um flokks­ins og berj­ast fyr­ir þeim. Mönn­um finnst ekki að það sé gert og fara að hugsa: Hvað varð um gamla, góða flokk­inn minn sem var ráð­andi og kom þess­ari þjóð á lapp­irn­ar með hug­mynda­fræði sinni und­ir stjórn gamla Óla Thors og gamla Bjarna Ben?“

„Ég horfi á minn flokk og spyr: Af hverju ætti fólk að kjósa ykk­ur eft­ir tvö ár ef þetta held­ur svona áfram? Menn eru ekki að tala fyr­ir ákveð­inni stefnu með nein­um þunga, nema með ör­fá­um und­an­tekn­ing­um,“ sagði Brynjar um flokk­inn en hann átti oft ekki sam­leið með leið­togum flokks­ins þegar hann var þing­maður. Þá var Brynjar einnig mikið gagn­rýndur af öðrum þing­mönnum fyrir lélega mæt­ingu.