Virði Icelandair hrynur þrátt fyrir 80 milljarða á bankabók: Bogi nær ekki eyrum fjárfesta

Hluta­bréfa­verð Icelandair hafa verið í frjálsu falli und­an­farnar vikur. Verðmæti fyr­ir­tæk­is­ins hefur lækkað um 23 millj­arða króna frá birt­ingu árs­hluta­upp­gjörs í júlí. Við það til­efni greindi Bogi Nils Bogason, for­stjóri Icelandair, frá því að leið­ar­kerfi félags­ins væri það stærsta í sögu þess. Jafn­framt sagði hann bók­un­ar­stöðu sterka og rekstr­ar­horfur góðar á seinni hluta árs­ins. Vef­mið­ill­inn turisti.is fjallar um geng­is­hrun Icelandair í dag.

Sömu sögu er þó ekki að segja af erlendum sam­keppn­is­að­ilum Icelandair en rekstr­ar­um­hverfi flug­fé­laga hefur sjaldan verið betra en um þessar mundir. Til að mynda hefur virði Finnair hækkað mikið á þessu ári en lækkað um 4 pró­sent frá birt­ingu síð­asta árs­fjórð­ungs­upp­gjörs eftir að for­stjóri félags­ins lét af störfum, líkt og turisti.is greinir frá. Gengi Icelandair í lok gær­dags var 1,71 krónur á hlut og hefur lækkað um fjórð­ung frá því í lok júlí.

Athygli hefur vakið að mark­aðsvirði Icelandair er aðeins um 70 millj­arðar króna eða tals­vert minna en flug­fé­lagið hefur sagst eiga í lausafé. Stjórn­ar­for­maður fjár­fest­inga­fé­lags­ins Stoða gagn­rýndi stjórn­endur Kviku banka nýlega í opin­berri yfir­lýs­ingu. Hann benti á að bók­fært virði eigna Kviku væri lægra en mark­aðsvirði bank­ans og skor­aði á stjórn­endur fyr­ir­tæk­is­ins að auka virði hlut­hafa. Starfs­loka­samn­ingur var gerður við for­stjóra bank­ans skömmu síðar.

Bogi Nils hefur verið for­stjóri Icelandair frá árinu 2018. Álits­gjafar Mannlífs segja Boga ekki ná eyrum fjár­festa. Þrátt fyrir góðar mark­aðs­að­stæður, met­um­svif fyr­ir­tæk­is­ins, bjartar fram­tíð­ar­horfur og hátt í 80 millj­arða króna inn á banka­bók, virð­ast stjórn­endur Icelandair ekki ná til fjár­festa. Geng­is­hrun hluta­bréfa fyr­ir­tæk­is­ins bendir til þess að fjár­festar hafi margir misst trú á stjórn­endum félags­ins.