Pósturinn mun endurgreiða viðskiptavinum
Pósturinn hefur gefið það frá sér tilkynningu um að fyrirtækið standi í því að endurgreiða viðskiptavinum vegna kerfivillu sem kom upp í innheimtu hjá þeim. Varð þetta til þess að ákveðnar sendingar sem bárust til landsins lentu í röngum verðflokki og hefur viðskiptavinum verið endurgreitt eða þeir fengið SMS-skilaboð um að þeir eigi rétt á slíku.
„Við biðjumst velvirðingar á þessum mistökum, við höfum unnið hörðum höndum að því að leiðrétta þau. Þegar mistökin uppgötvuðust var kerfið strax lagfært til þess að koma í veg fyrir frekari villur. Fara þurfti vel ofan í þessi mál og það hefur tekið tíma að finna upplýsingar um allar sendingar sem tengdust þessari kerfisvillu. Ég vil leggja áherslu á að allir viðskiptavinir sem eiga hlut að máli hafa fengið tilkynningu.“ sagði Gunnar Þór Tómasson, fjármálastjóri Póstsins um málið.
Póstinum barst ábending um villuna og brugðist var skjótt við. „Sem betur fer fengum við ábendingu og kerfisvillan var löguð strax. Í framhaldinu voru allir ferlar í kerfinu gaumgæfilega skoðaðir til þess að tryggja það að þetta endurtaki sig ekki. Það er forgangsmál að endurgreiða öllum hlutaðeigandi sem fyrst og við biðjum þá afsökunar á þessum mistökum,“ sagði Gunnar að lokum í tilkynningu frá Póstinum.
Athugasemdir