Lögregla var kölluð út skömmu eftir miðnætti vegna líkamsárásar í Hlíðunum. Þegar komið var á staðinn reyndist málið vera minniháttar. Síðar um nóttina, um klukkan hálf þrjú, hafði íbúi fjölbýlishúss samband við lögreglu vegna ógnandi manns í stigagangi. Lögregla mætti á vettvang og vísaði manninum af vettvangi.
Á sama tíma sinnti lögregla öðru útkalli í austurbænum. Þar stóð maður með hníf utan við hús en samkvæmt dagbók lögreglu fór maðurinn af vettvangi á bifreið og var stöðvaður stuttu síðar. Maðurinn var uppstökkur og fór ekki að fyrirmælum lögreglu svo að nauðsynlegt var að beita piparúða til að yfirbuga manninn. Ekki liggur fyrir hvað manninum gekk til en málið er til rannsóknar hjá lögreglu. Upp úr klukkan fjögur í nótt vaknaði íbúi við að barið var á glugga á heimili hans. Í ljós kom að maður hafði gengið um hverfið og barið ítrekað á glugga. Þegar lögregla kom á vettvang var maðurinn á bak og burt og engar skemmdir eða kröfur á hendur manninum.
Athugasemdir