Bæjarfulltrúi á Akureyri gleðst yfir formannsskiptum hjá Bandalagi kennara á Norðurlandi eystra.
Hildur Jana Gísladóttir, bæjarfulltrúi Samfylkingarinnar á Akureyri, gleðst yfir samstöðu Akureyringa með Samtökunum 78 í kjölfar falsfrétta og upplýsingaóreiðu sem reynt var að skapa í kringum samtökin í september.
„Í gærkvöldi bauð félag foreldrafélaga grunnskóla á Akureyri til fræðslu og fundar með fulltrúum Samtakanna 78 til að fræðast um það efni sem þau kenna grunnskólabörnum í sveitarfélaginu í vetur. Fundurinn var fjölmennur og vægast sagt góður. Fyrirfram voru örugglega einhver með hnút í maganum enda hafa bæði ýmsum röngum og misvísandi upplýsingum verið dreift um fræðslu samtakanna og það stundum líklega í þeim tilgangi að valda skaða,“ sagði bæjarfulltrúinn í pistli sem birtist á Akureyri.net.
„Það hefur síðan óneitanlega haft áhrif að formaður Bandalags kennara á Norðurlandi eystra (BKNE) hefur nánast daglega, opinberlega, viðrað ógeðfelld viðhorf sín og annarra um málefni hinsegin fólks, sem hafa sérstaklega beinst gegn transfólki. Þau gleðilegu tíðindi bárust hins vegar í gær að formannskipti hafa orðið hjá félaginu. Á þingi kennaranna var samþykkt lagabreyting sem fólst í því að framvegis skuli kjósa formann til eins árs í senn og tók breytingin gildi strax á þinginu.“
Kosið var strax og skipt um formann en formaðurinn fyrrverandi heitir Helga Dögg Sverrisdóttir og hefur hún verið mjög áberandi í umræðu um trans fólk undanfarin ár og hefur hún verið sökuð um hatur í garð trans fólks.
„Það var ekki síður ánægjulegt að finna kraftinn í foreldrum á svæðinu á fræðslufundinum í gærkvöldi, sem ef eitthvað er vildu frekar gera meira og betur á Akureyri í því skyni að fagna fjölbreytileikanum og skapa litskrúðugt og öruggt samfélag fyrir okkur öll. Ef marka má þann anda sem var á þessum fjölmenna fundi þá mun okkar samfélag sem betur fer ekki sætta sig við bakslag í réttindabaráttu hinsegin fólks, heldur sporna við þróuninni af fullum krafti,“ sagði Hildur að lokum.
Athugasemdir