Tveir refir gripu tækifærið er lamb í Flatatungu á Kjálka, varð afvelta í hríðarbylnum á þriðjudag, og gæddu sér á því.
Feykir segir frá því að tveir refir hafi lagst á afvelta lamb fyrir norðan í fyrradag. Þegar fjárins var vitjað á túnum í gærmorgun, höfðu refirnir rifið lambið á hol og voru að gera sér gott af því eins og það var orðað í fréttinni.
Það óhuggulegasta við þetta var það að lambið var enn lifandi þegar komið var að því en refirnir voru ekki lengi að láta sig hverfa. Síðar um daginn snéri þó annar þeirra til baka og var þá skotinn við lambshræið. „Dýrið var ungur mórauður refur, líklega gotinn vorið 2022. Sem betur fer er það frekar fátítt er að refir leggist á fé, en fennt fé og afvelta er líklegast til að verða rebba að bráð,“ segir Kári Gunnarsson en hann var fenginn til að koma og liggja fyrir tófunni.
Athugasemdir