Illugi Jökulsson skrifar um örlög nokkurra barna og ungmenna frá Gaza í nýrri Facebook-færslu.
Í færslunni birtir fjölmiðlamaðurinn Illugi Jökulsson ljósmyndir af tveimur börnum og einni ungri stúlku, öll fórnarlömb grimmilegra árása ísraelska hersins á Gaza. Clarissa Ward blaðamaður CNN hitti þau öll og fjallaði um þau. „Á neðri myndunum tveim er Amir, 20 mánaða. Hann fannst á götu í örmum dáinnar móður sinnar. Faðir hans er líka dáinn, bróðir hans og systir líka. Hann veit ekki að hann er orðinn munaðarlaus og kallar ákaft á foreldra sína,“ skrifar Illugi og lýsir næsta fórnarlambi: „Á efri myndinni til hægri er Jinan Sahar Mughari, 8 ára. Sprengjuárás var gerð á heimili hennar og hún er víða brotin, m.a. höfuðkúpubrotin. Hún er nú í gifsi um nær allan líkamann.“ Að lokum segir hann frá hinni tvítugu Lama Ali Hassan Alloush, sem var að byrja í verkfræðinámi við háskóla á Gaza þegar árásirnar hófust. Lama „flúði ásamt fjölskyldu sinni á svæði sem Ísraelsmenn sögðu að væri öruggt. Svo gerðu þeir árás á þann stað og nú er hún búin að missa annan fótinn.“
Bætti Illugi svo við í lokin kaldhæðinni setningu: „Ísraelar hafa náttúrlega rétt á að verja sig.“
Athugasemdir