Almannavarnir setja björgun dýra í sjálfheldu í Grindavík ekki í fyrsta forgang, samkvæmt ákalli Dýraverndarsambands Íslands.
Stjórn Dýraverndarsambands Íslands sendi rétt í þessu frá sér ákall til Almannavarna þar sem óskað er eftir því að brugðist verði við sauðfé í sjálfheldu í Grindavík. Sambandið segir að þau hafi fengið það staðfest að björgun sauðfésins sé metið út frá forgangsröðun verðmæta og þannig ekki sett í fyrsta forgang. „Dýr eru skyni gæddar verur með tilfinningar og sál, þau eru ekki hlutir og því er nauðsynlegt að aðhlynning og björgun þeirra sé sett í hærri forgangsröðun en dauðir hlutir,“ segir í ákalli og er óskað eftir því að brugðist verði við neyð dýranna.
Ákallið má lesa í heild sinni hér fyrir neðan.
Ákall Dýraverndarsambands Íslands til Almannavarna að bjarga dýrum í neyð!
Dýraverndarsambandið hefur fengið staðfest að björgun dýra í sjálfheldu í Grindavík sé metið út frá forgangsröðun verðmæta og sé skv. því ekki í fyrsta forgangi af hálfu almannavarna. Um er að ræða sauðfé í nokkrum fjárhúsum sem er innilokað og orðið bæði fóðurlaust og vatnslaust. Tvö fjárhús eru í bænum sjálfum.
Dýr eru skyni gæddar verur með tilfinningar og sál, þau eru ekki hlutir og því er nauðsynlegt að aðhlynning og björgun þeirra sé sett í hærri forgangsröðun en dauðir hlutir. DÍS bendir jafnframt á að skv. lögum um velferð dýra nr. 55/2013 er hverjum þeim er vart verður við dýr í neyð skylt að koma þeim til bjargar.
Dýraverndarsambandið óskar eftir að brugðist verði við í málinu í dag til að forða dýrunum frá þjáningu.
Stjórn Dýraverndarsambands Íslands
Athugasemdir