Björn Birgisson hneykslast á ákvörðun Ríkisútvarpsins um að halda söngvakeppni sjónvarpsins en láta sigurvegarann ákveða hvort keppt verði í Eurovision í Svíþjóð.
Gríðarleg pressa hefur verið á Stefán Eiríksson útvarpsstjóra, á að slaufa keppninni í ár, í ljósi þess að Ísrael fær að keppa í Malmö, þrátt fyrir það þjóðarmorð sem ríkið hefur framið á Palestínumönnum undanfarna þrjá mánuði. Sem dæmi má nefna skrifuðu yfir 500 tónlistarfólk undir áskorun um að Ríkisútvarpið hætti við að taka þátt í Eurovision þetta árið og stjórn Félags tónskálda og textahöfunda sendi einnig áskorun á RÚV, þar sem hins sama var krafist.
Samfélagsrýnirinn frá Grindavík, Björn Birgisson hittir oft naglann á höfuðið enda eru Facebook-færslur hans að jafnaði nokkuð vinsælar. Í nýlegri færslu skrifar hann við frétt um ákvörðun Ríkisútvarpsins um að halda söngvakeppni sjónvarpsins en ákveða eftir á, í samráði við sigurvegarann, hvort fara eigi með sigurlagið í Eurovision-söngvakeppnina sem haldin verður í Malmö í vor. Kallar Björn ákvörðun RÚV að leggja það á sigurvegarann hvort taka eigi þátt í Eurovision, „ræfilslega“. Þá segir hann einnig að þetta sé „rakinn fíflagang sem ber vott um alvarlega vanhæfni í starfi.“
Hér má lesa færsluna í heild sinni:
„Þetta er óttalega ræfilsleg ákvörðun. Að ætla að leggja það alfarið á sigurvegarann hér heima hvort Ísland tekur átt í Eurovision þetta árið.
Þeir sem eru á góðum launum við að stjórna eiga að þora að taka ákvarðanir, en ekki velta þeim yfir á aðra.Þetta er ekkert annað en rakinn fíflagangur sem ber vott um alvarlega vanhæfni í starfi.“
Athugasemdir