Solaris – Hjálparsamtök fyrir hælisleitendur og flóttafólk á Íslandi, hafa sett af stað söfnun svo bjarga megi þeim rúmlega 100 Palestínumönnum sem hafa dvalarleyfi á Íslandi, frá Gaza.
Fréttatilkynning frá Solaris – Hjálparsamtökum fyrir hælisleitendur og flóttafólk á Íslandi, barst fjölmiðlum í morgun en þar eru íslensk stjórnvöld harðlega gagnrýnd fyrir aðgerðaleysi hvað varðar það að koma þeim ríflega 100 Palestínumönnum sem þegar hafa fengið dvalarleyfi hér á landi, en Katrín Jakobsdóttir forsætisráðherra hefur sagt málið „flókið og umfangsmikið.“
Þremur konum hefur nú tekist á yfir rétt 90 klukkustundum, það sem ríkisstjórninni hefur ekki tekist í yfir þrjá mánuði að gera, en þær tóku sig til og flugu til Egyptalands og sóttu fjölskyldu frá Gaza. Um þetta er skrifað í fréttatilkynningu Solaris.
„Stjórnvöld hafa brugðist palestínsku þjóðinni og því hafa almennir borgarar tekið málið í sínar hendur.
Þrjár konur fóru á dögunum til Egyptalands eftir að þeim blöskraði aðgerðarleysi og mælskubrögð ríkisstjórnarinnar, auk áætlunum Ísraelsríkis um árásir á Rafah, þangað sem nær allt fólk á Gaza-svæðinu hefur flúið. Þar eru fjölskyldurnar sem hafa fengið dvalarleyfi á Íslandi á grundvelli fjölskyldusameiningar staddar. Konurnar brugðust við því neyðarástandi og vinna nú að því á eigin vegum að koma fólki yfir landamærin.
Nú þegar hefur einni palestínskri fjölskyldu, með dvalarleyfi á Íslandi, verið komið frá Gaza.“
Þar segir einnig að ráðherrar í ríkisstjórninni hafi lengi forðast að svara fyrir aðgerðaleysi sitt í þessu máli.
„Ráðherrar í ríkisstjórn Katrínar Jakobsdóttur hafa stöðugt forðað sér undan því að svara fyrir aðgerðarleysi sitt gagnvart dvalarleyfishöfum á Gaza. Í stað aðgerða gefa þeir í skyn að verið sé að íhuga mögulegar lausnir og að málið sé flókið. Þann 6. febrúar 2024 lýsti Katrín Jakobsdóttir, forsætisráðherra því yfir í viðtali hjá RÚV að verið væri að skoða aðgerðir sem væru „töluvert umfangsmiklar og flóknar“.“
Solaris segir málið hins vegar ekki flókið.
„Staðreyndin er sú að málið er ekki flókið.
Rúmlega hundrað einstaklingar frá Palestínu, sem hafa fengið dvalarleyfi á Íslandi á grundvelli fjölskyldusameiningar, hafa beðið mánuðum saman eftir liðsinni íslenskra stjórnvalda til að komast undan þjóðernishreinsunum ísraelskra stjórnvalda. Um er að ræða 128 einstaklinga, af þeim eru 75 börn, 44 mæður og 9 feður.
Íslensk stjórnvöld, einkum utanríkisráðuneytið, hafa ekki tekið þau mikilvægu skref sem til þarf til að koma fólkinu frá Gaza og til Íslands.
Á landamærum Egyptalands þarf að vera ábyrgðaraðili á vegum íslenskra stjórnvalda sem kæmi þeim til Kaíró. Þaðan myndi Alþjóðlega fólksflutningastofnunin (IOM) aðstoða þau við að ferðast til Íslands og greiða fyrir allt ferðalagið.“
Ennfremur segir í fréttatilkynningunni að ríkisstjórnin ætli sér ekki að koma fólkinu til aðstoðar í tæka tíð.
„Utanríkisráðuneytið hefur loksins viðurkennt að nauðsynlegt sé að hafa íslenskan fulltrúa til staðar á landamærunum til að taka á móti fólki. Það að enginn slíkur fulltrúi sé enn kominn á vettvang og að ekki sé útlit fyrir að það breytist, eins og utanríkisráðherra sagði þann 6. febrúar, gefur til kynna að stjórnvöld ætli sér ekki að koma fólkinu til aðstoðar í tæka tíð.
Stjórnvöld hafa staðið aðgerðalaus hjá mánuðum saman. Fólk sem býr hér á landi og bíður fjölskyldna sinna í örvæntingu hefur ítrekað óskað eftir samtali við ráðamenn. Óskum fólksins hefur nær eingöngu verið vísað frá eða ekki svarað. Á sama tíma hafa ráðherrar ríkisstjórnarinnar ítrekað farið með ósannindi til þess að afvegaleiða umræðuna og reynt að fría sig allri siðferðislegri ábyrgð.
Tíminn er á þrotum. Á Gaza er fólk í bráðri lífshættu. Það þarf að bregðast við þeirri neyð.“
Og þá komum við að mergi málsins. Solaris hefur hafið söfnun svo koma megi öllum þeim Palestínubúum sem hafa fengið dvalarleyfi á Íslandi, frá Gaza og til landsins, og þannig bjarga lífi þeirra.
„Að koma fólki út af Gaza og til Egyptalands kostar töluverða fjármuni. Heildarkostnaðurinn við að koma um 100 manneskjum löglega yfir landamærin, í samvinnu við þjónustuaðila og tengiliði sem starfa með egypskum og ísraelskum stjórnvöldum sem annast þessi mál, er um 50 milljónir íslenskra króna.
Saman getum við komið fjölskyldunum undan þjóðernishreinsunum og sameinað þau hér á landi.
Sett hefur verið af stað landssöfnun til að koma fleira fólki sem hefur fengið dvalarleyfi á grundvelli fjölskyldusameiningar frá Gaza og heim til Íslands.
Fyrir nánari upplýsingar
Tengiliðir í Egyptalandi
María Lilja Þrastardóttir, Bergþóra Snæbjörnsdóttir og Kristín Eiríksdóttir (00 354 6917277 eða +20 01555643722).
Tengiliðir á Íslandi
Sema Erla Serdaroglu (8228904) og Karen Kjartansdóttir (6929797).
Hægt er að styrkja söfnunina með því að leggja beint inn á sérstakan söfnunarreikning Solaris fyrir Palestínu eða með Aur appinu (mikilvægt að merkja aur færslur með titlinum Palestína).
Reikningsnúmer: 0515-14-007470
Kennitala: 600217-0380
AUR: 123 791951
SOLARIS
Hjálparsamtök fyrir hælisleitendur og flóttafólk á Íslandi
An aid organisation for refugees and asylum seekers in Iceland“
Athugasemdir