Egill Helgason kveðst leiður á „ógegnsæjum flugfarsgjöldum“ flugfélaganna.
Fjölmiðlamaðurinn Egill Helgason skrifaði Facebook-færslu í gær sem vakti athygli og ljóst að margir eru sammála því sem hann segir. Kveðst hann vera orðinn afar leiður á „ógegnsæjum flugfarsgjöldum“. „Í raun eru öll verð sem gefin eru upp á slíkum síðum röng – eins og maður kemst að þegar maður flettir áfram,“ skrifaði Egill og bætti við: „Vissulega ekki séríslenskt fyrirbæri en Neytendasamtökin mættu vel skoða þetta.“
Eins og áður segir vakti færslan athygli en fjölmargir líkuðu við hana og margir skrifuðu athugasemdir. Meðal annars Páll nokkur sem bendir á þá leið sem Ástralar fara í þessum málum. „Þetta var svona í Ástralíu en hér er búið að herða reglurnar þannig að maður getur alltaf borgað það far sem boðið er á vefsíðu flugfélagsana. Einu gjöldin sem þau geta „falið“ eru valkvætt eins og t.d. fyrir að fá að velja sæti, kolefnisjöfnun (frjálst val), glaldmiðlagjöld ef greitt er í erlendum gjaldmiðli, eða svo farangursgjöld (bara sum félög). Þessi breyting varð einhvern tíma á síðustu 10 árum og það var mikil framför.“
Bjarni nokkur ritaði einnig athugasemd: „Þetta er svona um allan heim. Nú bæta flest félög við gjöldum vegna farangurs, líka handfarangurs. Svo er nýr loftslagsskattur yfirvofandi. Ryanair vildi fá að rukka inn á klósettið í flugi, en var bannað af öryggisástæðum.“
Hinn skeleggi blaðamaður og fyrrum Kátur piltur, Jakob Bjarnar Grétarsson skaut föstum skotum á Egil og skar sig þannig nokkuð úr hvað athugasemdir varðaði: „Mér er alveg sama því ekki hef ég samvisku í að vera á stöðugu flandri um loftin blá með tilheyrandi mengun. En þeim er sama um það þessum sem tíðræðast er um loftslagsvá.“
Grímur Atlason svaraði Jakobi með húmor: „Enda stórsér á forgjöfinni!“
Blaðamanninum fannst þetta lítið fyndið og svaraði af bragði: „Já, þið hafið ekki áhyggjur þessir gosar, þú og Egill sem eruð eins og flókatrippi um allar koppagrundir. Það er ykkar val en sparið ykkur þá í Túnbergeríinu.“
Athugasemdir