Kanna hvort flutningaskip hafi hvolft bátnum:„Það var svolítið myrkur en ég sá svo rekald í sjónum“

Arnar Magn­ús­son, vél­stjóri úr Garðinum, hélt fyrst að um fljót­andi gám væri að ræða þegar hann kom á strand­veiði­bát sínum að öðrum slíkum báti á hvolfi sex sjó­mílur norð­vestur af Garð­skaga. Erlendu flutn­ings­skipi hefur verið stefnt til hafnar í Vest­manna­eyjum vegna máls­ins.

Sjá einnig: Búið að draga strand­veiði­bát­inn að landi – Bjarg­vætt­ur­inn sigldi aftur til veiða

Samkvæmt RÚV verður tekin skýrsla af áhöfn erlenda flutn­ings­skips­ins í Vest­manna­eyjum en verið er að rann­saka hvort sigl­ing skips­ins hafi ollið því að bátnum Hadda HF hvoldi í nótt. Skipið og bát­ur­inn voru á svip­uðum slóðum.

Maðurinn sem bjarg­aði Þorvaldi Árnasyni, skip­stjóra og eig­anda Hadda HF, sagði í við­tali við Vík­ur­fréttir að hann hefði séð rekald í sjónum og talið að þetta væri gámur á floti.

„Við vorum á svip­uðum tíma út en hann gengur aðeins hraðar hjá honum og hann var því aðeins á undan mér og var kom­inn utar en ég. Það var svo­lítið myrkur en ég sá svo rekald í sjónum og sagði við sjálfan mig, „er þetta gámur?“ því þeir eru alltaf að missa gáma í sjó­inn. Það var frakt­flutn­inga­skip nýbúið að fara hérna hjá. Þegar ég kem nær sé ég að þetta er bátur á hvolfi,“ segir Arnar Magn­ús­son sem stundar strand­veiðar frá Sand­gerði.