Það andaði köldu á milli Sigfúsar og Ingvars árið 1993.
Mikil harka var í deildum Sigfúsar Sverrissonar, eigenda Teningsins, og Ingvars Jónssonar, eiganda Íshallarinnar, árið 1993 en DV greindi frá málinu.
„Hann er búinn aö taka rafmagnið af mér, leggja stórum bílum fyrir utan búðina hjá mér og stífla niðurfallið,“ sagði Sigfús um Ingvar en sjoppur þeirra voru hlið við hlið á Snorrabraut. Sigfús sagðist einnig vera að undirbúa kæru á hendur Ingvari.
„Ingvar er búinn að vera að gera allt til að eyðileggja þessa búð með níðyrðum og skrifandi rógburð um að ísinn hjá mér sé ónýtur. Hann hengir tilkynningar um þetta upp í búð hjá sér. Ég hef mörg vitni að þessu. Í vikunni setti ég svo upp skilti og hann kom og reif það niður fyrir framan mig. Svo þegar ég kom í vinnuna um daginn var búið að brjóta skiltið í tvennt og troða eldspýtu í skrána í hurðinni. Ég er bara búinn að fá nóg og þess vegna ætla ég að kæra þetta,“ hélt Sigfús áfram.
Segir Sigfús halda miðnæturmessur
„Megnið af þessu er tóm haugalygi. Ástæðan fyrir því að ég tók rafmagnið af hjá honum er sú að hann skuldaði 30 þúsund í rafmagnsreikning, sem hann skuldar reyndar enn. Þetta með niðurfallið veit ég ekkert um, né stóra bílinn og skráargatið. Hvað skiltið varðar þá er ágreiningur um það hvorum veggurinn, sem skiltið er á, tilheyrir. Skiltið náði langt inn á minn hluta veggjarins og ég bað hann að taka það niður en hann svaraði því til að ég ætti að stikna í helvíti á efsta degi og sagði mér að fara í burtu. Ég viðurkenni samt ekki að hafa brotið skiltið,“ sagði Ingvar.
„Hann á voðalega erfitt, þessi maður. Hann stóð hérna í klukkutíma fyrir utan verslunina mina í gær og spurði gangandi vegfarendur hvort þeir ætluðu virkilega að fara inn í þetta helvíti. Þetta er maður sem er í einhverjum sértrúarsöfnuði og er oft með guðsþjónustur hér langt fram á nætur í óþökk íbúanna hérna í húsinu. Að öðru leyti er þetta ekki svaravert,“ sagði Ingvar, eigandi Íshallarinnar, að lokum.
Athugasemdir