Átta einstaklingar gista í fangaklefa á höfuðborgarsvæðinu eftir nóttina en alls voru 125 mál bókuð í kerfum lögreglunnar frá 17:00 til 05:00. Hér má lesa helstu málin sem upp komu á tímabilinu.
Pöddufullum aðila var komið til aðstoðar í miðborginni og var ekið heim til sín. Í sama hverfi stal óprúttinn aðili fatnaði ásamt verðmætum af sundlaugagesti. Þá var ofurölvi ökumaður stöðvaður í miðbænum auk þess sem þriggja bíla árekstur varð í 101 en talsvert eignartjón hlaust af honum, sem og minniháttar meiðsli. Líkamsárás var tilkynnt í miðborginni og maður handtekinn vegna hennar og settur í steininn. Þá var maður til vandræða í 101 og vistaður í fangaklefa þar sem hann þótti ekki vera í ástandi til að vera úti á meðal almennnings.
Í 104 voru þrír einstaklingar handteknir vegna hótana og vopnalaga en allir voru þeir vistaðir í fangaklefa.
Í hverfi 105 kviknaði í íbúðarhúsi en slökkviliðið kom á vettvang og gekk því vel að slökkva eldinn. Í sama hverfi var brotist inn í fjölbýlishús og verðmætum stolið.
Í Kópavogi rann mannlaus bíll á annan bíl eftir að ökumaður hans hafði ekki gengið tryggilega frá honum. Þá varð umferðaróhapp í Kópavogi þegar ökumaður bifreiðar, undir áhrifum fíkniefna, ók aftan á aðra bifreið.
Maður var handtekinn í hverfi 110 vegna eignaspjalla og hótana og var hann vistaður í steininum. Í sama hverfi léku hópur ungmenna sér að því að ónáða íbúa með því að kasta flugeldum í hús.
Athugasemdir