Orðrómar Mannlífs hafa lengi verið vinsælir en hér fyrir neðan má sjá lista yfir tíu mest lesnu Orðrómana ársins 2024.
10. Vilhjálmur æpti á soninn
Nokkurt uppnám varð á þorrablóti Stjörnunnar í Garðabæ þegar stjörnulögmaðurinn Vilhjálmur Hans Vilhjálmsson er sagður hafa misst stjórn á skapi sínu undir uppistandi Helga Brynjarssonar, sonar veislustjórans Brynjars Níelssonar. Eitthvað fór grín Helga um skjólstæðing Villa, Jón Baldvin Hannibalsson, fyrir brjóstið á lögmanninum en í Orðróminum er ýjað að því að lengi hafi andað köldu á milli Villa og Brynjars.
Lágvöruverslunin Prís opnaði 2024 en því fögnuðu margir enda samkeppni alltaf af hinu góða. Hins vegar voru það þó nokkrir sem hváðu við er þeir heyrðu að ekki yrði tekið við reiðufé í versluninni og hétu því að stíga aldrei fæti þar.
Fjölmargir Grindvíkingar voru óánægðir með Almannavarnir sem á tímabili þóttu beita nokkurri ofstjórn að margra mati varðandi aðgengi bæjarbúa að bænum. Eigandi fiskvinnslunnar Einhamars, Stefán Kristjánsson gagnrýndi Almannavarnir og Víði Reynisson harðlega í Facebook-færslu og sagði hann og fleiri sem að málinu kæmi, mættu skammast sín fyrir „fantaskapinn“.
Söngvakeppni evrópskra sjónvarpsstöðva fór fram árið 2024 eins og mörg önnur ár en hún var með umdeildara móti þar sem Ísrael var leyft að keppa, þrátt fyrir stríðsglæpi sína gegn Palestínumönnum, á sama tíma og Rússum var meinuð þátttaka vegna innrásarstríðs þeirra í Úkraínu. Gísli Marteinn Baldursson, sem verið hefur kynnir keppninnar um árabil, harðneitaði að lýsa keppninni vegna samvisku sinnar en var fjölmiðlakonan Guðrún Dís Emilsdóttir fengin í hans stað. Mörgum þótti frammistaða hennar undir meðallagi og söknuðu Gísla Marteins mikið, aldrei þessu vant.
Áður en Gísli Marteinn ákvað að bjóða ekki fram krafta sína í Júróvisjón-söngvakeppnina í Malmö, var því velt fyrir sér í Orðrómi Mannlífs, hvort RÚV-arar teldu Gísla Martein æskilegan til að lýsa keppninni, í ljósi afstöðu hans gagnvart þjóðarmorðinu á Gaza. Gísli hafði þar að auki ekki farið leynt með aðdáun sína á Palestínumanninum Bashar Murad, sem tapaði naumlega fyrir Heru Björk í söngvakeppninni hér heima.
Halla Hrund Logadóttir, sem var afar áberandi fyrir forsetakosningarnar síðustu, bauð sig fram til þings fyrir Framsóknarflokkinn. Var talað um hana sem vonarstjörnu hins gamla bændaflokks en mörgum þótti hún lítið sjást í kosningabaráttu flokksins en eftir á að hyggja, þá kom það ekki að sök því jú, hún náði á þing.
4. Hjónaband Snorra í uppnámi
Snorri Másson og Nadine Guðrún Yaghi gengu í það heilaga á Siglufirði árið 2024, að því er þau töldu með löglegum hætti en annað kom á bátinn. Nadine Guðrún sagði frá því í þætti á Rás 1 að Þjóðskrá hafi neitað að skrá hjúskapinn sem löggildan nema að fá frumrit af fæðingarvottorði brúðarinnar. Vandinn lá þó þannig að Nadine Guðrún er fædd í Katar og þar liggur frumritið. Stjórnvöld þar í landi harðneituðu að senda frumritið í pósti og kröfðust þess að hún kæmi sjálf og sótti það.
Einn ástsælasti leikari Íslands, Ólafur Darri Ólafsson birti bráðskemmtilegt myndskeið á samfélagsmiðlum þar sem hann sýndi óvænta danshæfileika sína ásamt dóttur sinni. Hins vegar var myndskeiðið horfið daginn eftir af internetinu af einhverri ástæðu en lifir líklega áfram í hjörtum þeirra sem náðu að sjá danstakta Hollywood-leikarans fótfráa.
Halla Hrund Logadóttir varð uppvís að vandræðalegri staðreynd þegar kosningabaráttan um Bessastaði stóð sem hæst. Morgunblaðið benti nefnielga á það að Karen Kjartansdóttir, þáverandi samskiptastjóri Orkustofnunar hafi verið að vinna að kosningunum í sjálfboðavinnu fyrir yfirmann sinn, Höllu Hrund og á verktakalaunum frá Orkustofnun. í Orðróminum var ýjað að því að Sara Lind Guðbergsdóttir, þá bráðabirgðaorkumálastjóri og eiginkona Moggaspyrilsins Stefáns E. Stefánssonar, hafi veitt Morgunblaðinu upplýsingar um málið.
Vinsælasti Orðrómur ársins 2024 fjallar um uppnám á samfélagsmiðlum vegna afar ósmekklegs brandara tónlistarmannsins Patriks Snæs Atlasonar, eða Prettyboitjokko eins og hann er stundum kallaður. Patrik var í útvarpsþættinum Veislan á FM957 þegar hann lét brandarann sleppa úr vörum sér. Snérist brandarinn um nauðgun en Patrik spurði innhringjanda hvort hann hyggðist taka með sér botnlaust tjald á Þjóðhátíð í Vestmannaeyjum, sem er vísun í hrottalega nauðgunaraðferð. Þættinum var slúttað og allt benti til þess að Patrik yrði sömuleiðis slaufað en raunin varð að lokum önnur, enda vinsældir hans í dag nærri óskiljanlegar, að sumra mati.
Athugasemdir