Fjármál hins opinbera eru ekki nægilega gagnsæ svo að fólk geti með góðu móti lagt fram tillögur til hagræðingar sem byggja á dæmum um sóun eða verkefni sem falla mættu niður. Þessu heldur Björn Leví Gunnarsson fram í færslu í samráðsgátt stjórnvalda.
Alls hafa tæplega 2.900 tillögur verið sendar inn í samráðsgáttina af almenningi en Björn Leví, sem er fyrrverandi þingmaður Pírata, segir að þar sem kostnaði er ekki deilt niður á hvert lögbundið verkefni í fjárlögum eða fjármálaáætlun, sé eftir að fylgjast með útgjöldunum. Segir hann að bæði almenningur og þingmenn ættu meiri möguleika á að fylgjast með gangi ríkisrekstursins, ef upplýsingar um öll lögbundin verkefni hins opinbera og kostnað við þau væru opinberar.
„Á meðan það er rétt að kostnaði er ekki deilt niður á hvert lögbundið verkefni í fjárlögum, þá er það hvergi aðgengilegt hvernig kostnaður skiptist milli lögbundinna verkefna,“ skrifar Björn Leví í færslunni. Stingur hann upp á því að upplýsingar um slík útgjöld verði gefnar á aðgengilegan hátt og nefnir síðuna Opnir reikningar sem fyrirmynd.
„Opið aðgengi að þessum upplýsingum gerði það að verkum að það væri auðveldara að spyrja um einstaka verkefni og rekstrarforsendur þeirra verkefna og allt sem af því leiðir.“
Athugasemdir