Víðir Sigurðsson, íþróttablaðamaður Morgunblaðsins, birti nokkuð áhugaverðan pistil í blaðinu í dag en hann snýst um Gunnar Magnússon, þjálfara Aftureldingar í handbolta.
Þannig er mál með vexti að Gunnar var ráðinn af Degi Sigurðssyni, landsliðsþjálfara Króatíu, til að greina leik mótherja liðsins og var Ísland, eins og margir muna eftir, einn af þeim mótherjum. Gamall kunningi Víðs setti sig í samband við hann og sagði að slíkt væru svik enda væri Gunnar fyrrverandi aðstoðarlandsliðsþjálfari Íslands og hefði þjálfað marga menn í íslenska landsliðinu.
Í pistlinum tekur Víðir undir sjónarmið kunningja síns.
„Þarna má hins vegar setja spurningu við siðferðið. Vissulega er handbolti bara leikur.
En yrðum við sátt ef fyrrverandi aðstoðarmaður utanríkisráðherra myndi gera úttekt á varnarmálum Íslands fyrir óvinveitta þjóð?
Ég er ekki viss um það,“ skrifar blaðamaðurinn reyndi um málið.
Athugasemdir