Þorgerður Katrín Gunnarsdóttir utanríkisráðherra Íslands, segir afstöðu stjórnvalda skýra gagnvart Grændlandi. Þá býst hún ekki við að varnarsamstarf Bandaríkjanna við Ísland sé í hættu.
Donald Trump Bandaríkjaforseti hefur farið mikinn síðan hann tók við embætti forseta Bandaríkjanna en hann hefur meðal annars lýst yfir áhuga sínum á að eignast Grænland. Ekki eru allir sáttir við þann áhuga en Danir eru æfir yfir honum og 85 prósent Grænlendinga er á móti þeirri hugmynd að landið verði innlimað inn í Bandaríkin.
Þorgerður Katrín Gunnarsdóttir utanríkisráðherra segir í samtali við Mannlíf að afstaka íslenskra stjórnvalda sé skýr í málinu, Grænlendingar eigi að ráða sinni framtíðarsýn.
„Afstaða íslenskra stjórnvalda er skýr, framtíð Grænlands á að vera í höndum Grænlendinga og er samhljóma eindreginni afstöðu Norðurlandanna og fleiri Evrópuríkja,“ segir Þorgerður Katrín aðspurð um afstöðu Íslands gagnvart áhuga Bandaríkjaforseta á Grænlandi.
Bætir Þorgerður Katrín því við að krafa Íslands um að öll ríki virði alþjóðalög séu skýr.
„Þá er sömuleiðis skýr krafa af hálfu Íslands að öll ríki virði alþjóðalög, friðhelgi landamæra og landhelgi og sjálfsákvörðunarrétt þjóða og á það jafnt við um Bandaríkin sem og önnur ríki.“
En óttast utanríkisráðherra að tollarefsingum verði beitt gegn Íslandi? Ef svo er, er til aðgerðaráætlun til að bregðast við þeim?
„Utanríkisráðuneytið fylgist grannt með umræðu um mögulegar tollahækkanir Bandaríkjastjórnar og á í virkum samskiptum við aðildarsamtök íslensks atvinnulífs sem eru í vöruútflutningi.“
Að lokum segir Þorgerður Katrín, aðspurð hvort varnarsamningur milli Bandaríkjanna og Íslands sé í hættu vegna Grænlandsáhuga Donalds Trump, að hún búist við því að eiga áfram í nánu öryggis- og varnarsamstarfi við Bandaríkin.
„Við gerum fastlega ráð fyrir að eiga áfram í nánu öryggis- og varnarsamstarfi við Bandaríkin, okkar nánustu bandamenn til áratuga. Tvíhliða varnarsamningur þjóðanna frá árinu 1951 lifir enn góðu lífi sem og náið samstarf okkar á vettvangi Atlantshafsbandalagsins.“
Ekki svaraði utanríkisráðherra spurningu Mannlífs um það hvort Bandaríkin fengju að notast við Keflavíkurflugvöll ef Trump hyggðist beita hernaðaraðgerð gagnvart Grænlandi.
Athugasemdir