Undirskriftarsöfnun gegn þátttöku Íslands í Eurovision hafin – Allir flytjendur vilja keppa úti

Und­ir­skrift­ar­söfnun er hafin þar sem þess er að kraf­ist að RÚV dragi Ísland úr Eurovision verði Ísrael ekki meinuð þátt­taka í Eurovision í ár. Allir kepp­endur í Söngvakeppn­inni hafa sam­þykkt að taka þátt úti í Sviss, vinni þeir.

Lóa Hlín Hjálmtýs­dóttir stendur fyrir und­ir­skrift­ar­söfnun þar sem þess er kraf­ist að RÚV dragi Ísland úr Eurovision í ár, verði Ísrael ekki meinuð þátt­taka í Eurovision sem fram fer í Sviss í maí næst­kom­andi.

Eft­ir­far­andi texti er skrif­aður á síðu und­ir­skrift­ar­söfn­un­ar­innar:

„Við und­ir­rituð förum fram á að RÚV dragi Ísland úr Söngvakeppni evr­ópskra sjón­varps­stöðva árið 2025 verði Ísrael ekki mein­aður aðgangur að keppn­inni. Fram­ganga Ísraels í Palest­ínu stríðir gegn yfir­lýstum frið­ar­boð­skap Söngvakeppn­innar. Yfir fjöru­tíu þús­und mann­eskjur hafa verið drepnar í sprengjuregni Ísraels á Palest­ínu. Ísrael hefur eyði­lagt nán­ast öll sjúkra­hús og skóla á Gaza, jafnað heilu þorpin og borg­irnar við jörðu, brennt tjald­búðir flótta­fólks, myrt óbreytta borg­ara þar á meðal: börn, barns­haf­andi konur, sjúk­linga, lækna, hjálp­ar­starfs­fólk alþjóð­legra stofn­ana, kenn­ara og blaða­menn. Þrátt fyrir þetta fær Ísrael að taka þátt í Söngvakeppni evr­ópskra sjón­varps­stöðva árið 2025 í stað þess að þeim sé meinuð þátt­taka eins og Rúss­landi vegna inn­rás­ar­innar í Úkraínu.“

Mannlíf heyrði í Rúnari Frey Gísla­sonar verk­efna­stjóra sjón­varps og spurði hann hvort til greina kæmi fyrir RÚV að taka af skarið og krefjas þess að Ísrael verði vikið úr keppni í ár, rétt eins og þegar finnska rík­is­út­varpið (YLE), krafð­ist þess að Rússland yrði meinuð þátt­taka vegna inn­rás­ar­innar í Úkraínu.

„Við fylgj­umst náið með allri þróun mála og stillum saman strengi fyrst og fremst með kol­legum okkar á Norð­ur­löndum, eins og hingað til og áður hefur komið fram,“ sagði Rúnar Freyr í skrif­legu svari sínu til Mannlífs.

Í fyrra gaf einn af þáttak­endum Söngvakeppn­innar, Sunna Krist­ins­dóttir, þá yfir­lýs­ingu að hún ætl­aði sér ekki að keppa í Eurovision, ef ske kynni að hún stæði upp sem sig­ur­veg­ari, vegna með­ferðar Ísraela á Palest­ínu­mönnum á Gaza. Þá fór Ásdís María Við­ars­dóttir, einn af höf­undum sig­ur­lags­ins í fyrra, Scared of Heights, ekki með hópnum út í Eurovision, af sömu ástæðum. En hvernig standa málin í ár? Er ein­hver kepp­and­anna sem stíga á svið annað kvöld, búinn að gefa það út að hann hygg­ist ekki taka þátt í Eurovision?

Rúnar Freyr segir svo ekki vera: „Nei, kepp­endur í ár hafa öll sam­þykkt að taka þátt í Eurovision, sigri þau Söngvakeppn­ina. Eins og alltaf – nema í fyrra – fylgir það því að taka þátt í Söngvakeppn­inni.“