Eftir kvikuhlaupið 1. apríl síðastliðinn hafa nýjar sprungur og holur verið að finnast á Reykjanesi.
Mynd var birt í morgun af nýrri holu skammt frá svokallaðri Brú á milli heimsálfa, sem er þekktur og vinsæll ferðamannastaður sem á að tákna skil á milli Evrópu- og Ameríkuflekans. „Um helgina tók ég eftir þessari nýju holu við Brúnna milli Heimsálfa, það eru greinileg lítil göng þarna undir,“ sagði meðlimur í hópnum Jarðsöguvinir.
Annar leiðsögumaður bendir á að ný sprunga hafi sést á Valahnúk, sem er við enda Reykjanesvitavegar, við bílastæði að Reykjanestá. Valahnúkur er sérstaklega kynntur sem ferðamannastaður á vefnum Visit Reykjanes, án þess að þar sé þess getið að hætta sé á svæðinu.
Veðurstofa Íslands hefur í tilkynningum ekki varað sérstaklega við sprungum utan skilgreinds hættusvæðis í kringum Grindavík og Sundhnúksgígaröðina. Verkfræðistofan Örugg vinnur áhættumat fyrir almannavarnir sem Veðurstofan birtir.
Í áhættumatinu segir að „þrátt fyrir að hættustig á þessum svæðum hafi verið lækkað er enn talsverð hætta á jarðfalli ofan í sprungur“ á öllum matssvæðum, sem er nágrenni Grindavíkur, Svartsengi og gossvæðið.
„Í Grindavík er áhætta metin miðlungs fyrir alla aðila, en þó há að nóttu fyrir íbúa, ytri aðila og ferðamenn. Á Svartsengissvæðinu er áhætta talin miðlungs fyrir alla aðila. Á gos-/sprengisvæði er áhættan hins vegar mjög há fyrir viðbragðsaðila, ráðgjafa og verktaka og óásættanleg fyrir ytri aðila og ferðamenn. Mælt er gegn því að óviðkomandi fari inn á gos- og sprengisvæði,“ segir í matinu.
Fyrir utan hættusvæðið í kringum Grindavík hefur verið varað við gömlum sprengjum sunnan Reykjanesbrautar við Voga að gossvæðinu og Fagradalsfjalli.
Opið er fyrir alla umferð til og frá Grindavík og Bláa lónið er opið, eins og hótelið Northern Light Inn.
Athugasemdir