Jóhann Helgi Hlöðversson hefur alið hrafninn Dimmu upp síðan hún fannst blaut og hrakin á Selfossi sem ungi en samband þeirra er hreint út sagt einstakt. Hefur Mannlíf áður fjallað um vinina.
Jóhann Helgi skrifaði Facebook-færslu í dag um gjöf sem hann fékk frá Dimmu en það var fjöður úr henni.
„Dimma er falleg sál. Á leiðinni í ræktina í morgun sagði Magga, Jói … Dimma er að reyna ná sambandi við þig! Ég snéri mér að búrinu hennar og sá að hún reyndi að ná athygli minni með því að rétta út úr búrinu stóra fjöður úr sjálfri sér.“
Þannig hefst frásögn Jóhanns Helga, sem í næstu orðum segist hafa spurt Dimmu sína hvort fjöðrin væri handa sér og auðvitað svaraði fuglinn.
„Ég kraup niður að henni og spurði hana hvort hún ætlaði að gefa mér þessa fjöður? Hún rétti mér fjöðrina og sleppti henni í lófann minn og þegar ég sagði VÁÁ Dimma! Ætlar þú að gefa pabba þessa fjöður? Þá setti hún hausinn niður og dillaði stélinu ótt og títt og var greinilega mjög ánægð með mín viðbrögð yfir þessari gjöf.“
Segir Jóhann Helgi að Dimma hafi áður gefið honum fjöður og segir hana ákaflega þakkláta og gjafmilda:
„Dimma er orðin fimm eða sex ára og hefur áður fært mér fjöður frá sér með sömu viðhöfn og látbragði. Dimma þakkar mér einnig oft fyrir þegar ég færi henni eitthvað sérstaklega gott í matardallinn. Hún er ákaflega gjafmild og gefur frá sér mat til hundanna og er einnig farin að fæða tvo hrafna sem líta til hennar af og til.“
Að lokum segist Jóhann Helgi aldrei hafa vanið sig á að gefa dýrunum sínum nammi þegar hann hefur þjálfað þau, heldur aðeins hrós og segist hafa tekið eftir því að allar dýrategundir séu eins innan við beinið.
„Ég hef aldrei vanið mig á að gefa dýrunum mínum nammi við þjálfun heldur nota ég einungis hrós. Ég hef tekið eftir því að við erum öll eins innan við beinið og skiptir þá engu máli af hvaða dýrategund við teljumst vera:) Dimma tekur undir máltækið “Sælla er að gefa en þiggja”.“
Athugasemdir