Mikill verðmunur er á olíupönnu fyrir bíl af gerðinni Mazda 2 og munar þar 96 þúsund krónum á vörunni í tveimur verslunum, AB Varahlutir og Brimborg.
Einstaklingur sem hafði samband við Mannlíf vantaði nýja olíupönnu í bíl sinn af gerðinni Mazda 2.
Hafði viðkomandi samband við umboðið sem flytur inn bíla af gerðinni Mazda, Brimborg, sem ekki átti til olíupönnu fyrir þennan bíl.
Starfsmaður Brimborgar bauðst því til að panta olíupönnuna að utan, en að það væri um fjögurra vikna bið eftir henni og að hún myndi kosta komin hingað til lands 108 þúsund íslenskar krónur.
Eigandi bílsins er að eigin sögn enginn sérfræðingur í varahlutum fyrir bíla. Hann taldi þó í fyrstu að þetta væri sanngjarnt verð, og eðlilegur biðtími, sem þó kom honum afar illa, því hann er í þannig vinnu að hann getur ekki verið bíllaus nema í stuttan tíma.
Maðurinn var á heimleið frá Brimborg í þungum þönkum og áhyggjufullur er hann tók eftir því að verslunin AB Varahlutir er mjög nálægt Brimborg, en bæði fyrirtækin eru staðsett uppi á Höfða.
Hann ákvað að skoða málið nánar og spyrjast fyrir um það hjá AB Varahlutum hvort olíupanna eins og honum vantaði væri þar til á lager eða hvort biðtíminn eftir slíkri pönnu væri sttyttri en hjá Brimborg, og þá mögulega á hagstæðara verði.
Viðbrögðin komu honum ánægjulega á óvart.
Hjá AB varahlutum var téð olíupanna til á lager og verðið á henni í versluninni var tæpar tólf þúsund krónur.
Það munaði því heilum 96 þúsund krónum á olíupönnu fyrir Mazda 2, og í prósentum talið er þessi verðmunur 800 prósent.
Mannlíf sendi tölvupóst á Brimborg vegna málsins en hafði ekki borist svar þegar fréttin birtist.
Athugasemdir