Yfirmaður sjúkraflutninga á Suðurlandi vill leysa langan viðbragðstíma í Öræfum, er rannsóknarnefnd samgönguslysa gagnrýnir eftir banaslys þar í fyrra, með því að þjálfa betur björgunarsveitarfólk og þá þurfi meira fjármagn til að greiða fólki fyrir bakvaktir.
Eins og áður hefur komið fram þá létust tveir í banaslysi við Skaftafell í janúar í fyrra, og sex slösuðust.
Rannsóknarnefnd samgönguslysa benti á dæmi um að fyrsti sjúkrabíll hafi komið á staðinn 44 mínútum eftir útkall. Langt er í næstu sjúkrabíla sem eru staðsettir á Kirkjubæjarklaustri sem og á Höfn í Hornafirði.
Leggur nefndin til að viðbragðsbíll í Skaftafelli verði tiltækur allt árið en ekki bara yfir sumarið.
Fyrirmaður sjúkraflutninga á Suðurlandi, Hermann Marinó Maggýjarson, sagði í samtali við RÚV að viðbragðsaðilar frá björgunarsveitinni Kára er voru á undan sjúkrabílnum á vettvang hefðu hlotið þjálfun og að sveitin sé með samning við heilbrigðisstofnun Suðurlands:
„Það sem við sjáum fyrir okkur er annars vegar að mennta fólkið betur. Auðvitað vill enginn gera allt launalaust þannig að ákall heimamanna í Öræfunum er að fá einhvers konar bakvaktarkerfi þar sem þeir eru tveir á vakt sem geta sinnt bráðaviðbragði.“
Bætir við:
„Ef heilbrigðisráðuneytið er tilbúið að vera með fullmannaðan sjúkrabíl í Öræfunum þá er það líka frábært. En þá spyr maður sig líka: Ef sjúkrabílinn í Öræfunum þarf að fara alla þessa leið þá er ekkert viðbragð í Öræfunum. Þannig að ég sé fyrir mér frekar að heimamenn geti brugðist við; sinnt veikum og slösuðum þangað til að sjúkrabifreiðar koma frá annað hvort Höfn eða Kirkjubæjarklaustri.“
Segir að endingu:
„Helst myndi ég vilja sjá líka bara malbikaðan flugvöll í Skaftafelli svo að sjúkraflugvél frá Akureyri gæti komið. Það myndi nú líka hjálpa okkur mikið,“ sagði Hermann Marinó Maggýjarson, yfirmaður sjúkraflutninga hjá Heilbrigðisstofnun Suðurlands.
Athugasemdir