Hjalti Snær Árnason hvarf þann 22. mars og kom fram í fréttum á þeim tíma að leitað hafi verið að manneskju í sjónum við Kirkjusand. Það reyndist vera Hjalti og komu kafarar, björgunarsveitir, þyrla Landhelgisgæslunnar, lögregla og slökkvilið að leitinni.
Gerður Ósk Hjaltadóttir, móðir Hjalta, lýsir því í ítarlegu viðtali við Heimildina hvernig einhverfur sonur hennar gekk á veggi allt sitt líf.
Eitt af því sem Gerður segir frá við Heimildina er síðasta símtal sem hún átti við son sinn en hann var vistaður á Laugarásnum í Reykjavík, sérhæfðri deild á vegum Landspítalans fyrir ungt fólk með geðrofssjúkdóm á byrjunarstigi, en fjölskylda hans býr á Akureyri. Símtalið átti sér stað daginn fyrir hvarf hans.
„Hann sagðist ekki geta sofið. Hann sagði líka: Mamma, ég er búinn að missa trúna. Þá vissi ég að það væri eitthvað í gangi. Við vorum alveg örugg um að hann myndi ekki fyrirfara sér á meðan hann hafði trúna. Hann hafði viljað gerast píslarvottur en ekki þetta. Ég var búin að plana að koma suður á sunnudeginum og sagði honum það. Hann sagðist vera svo vonlaus og að hann hefði ekkert til að lifa fyrir. Ég hvatti hann til að horfa á Disney-mynd eða Harry Potter til að láta tímann líða þar til ég yrði komin tveimur dögum síðar. Svo heyrði ég að það var kallað á hann í viðtal. Ég sagði: Hjalti, það er verið að grípa þig. Nú bara tekur þú við því. Síðan sagði ég bless. Ég var viss um að hann væri að fá þá hjálp sem hann þurfti,“ sagði Gerður við Heimildina.
Í kjölfarið sendi hún svo málstjóra Hjalta SMS þar sem hún sagði að það væri mikilvægt að passa vel upp á Hjalta af því að hann væri orðinn uppfullur af vonleysi en væri loksins tilbúinn til að tala um það.
Athugasemdir