Lögreglan á höfuðborgarsvæðinu greinir frá því á samfélagsmiðlum að bankarán frá árinu 1975 hafi verið upplýst og að einn af þeim sem stóð fyrir ráninu hafi gefið sig fram.
„Í ársbyrjun 1975 var stolið rúmlega 30 þúsund krónum (þávirði) úr Útvegsbankanum sáluga í Kópavogi,“ skrifar lögreglan á samfélagsmiðla um málið.
„Á þessum tíma stóðu yfir framkvæmdir við húsnæði bankans og af þeirri ástæðu áttu þjófarnir greiða leið inn í bankann í skjóli nætur. Innandyra var m.a. að finna allnokkrar fötur með smámynt í og þeim stálu þjófarnir. Á litlu var að byggja við rannsókn málsins, en einhverjir voru þó yfirheyrðir án þess þó að tækist að upplýsa þjófnaðinn.“
Lögreglan segir að málið hafi fallið í gleymsku þar í sumar þegar einn af bankaræningjunum gaf sig fram „Hvað varð til þess að maðurinn játaði sök hálfri öld síðar skal ósagt látið, en sjálfsagt er alltaf gott að létta á samviskunni. Við heimsóknina á lögreglustöðina sagði maðurinn frá því að hann hefði verið að verki ásamt nokkrum vinum sínum, en þeir voru allir um fermingaraldur á þessum tíma,“ heldur lögreglan áfram.
Að sögn lögreglu er broti fyrnt en mennirnir földu peningana á góðum stað og sóttu eftir þörfum. Þeir notuð þá helst til að gera vel við sig í mat og drykk.
Athugasemdir