Sprenging í stórmarkaði drap að minnsta kosti 23 manns í norðurhluta Mexíkó í gær, samkvæmt heimamönnum, og sögðu rannsóknaraðilar að sprengingin hafi verið slys sem hugsanlega stafaði af biluðum spennubreyti.
„Því miður eru nokkur fórnarlömbin sem við höfum fundið börn,“ sagði Alfonso Durazo, ríkisstjóri Sonora fylkis, þegar hann tilkynnti um 23 látna og 11 særða.
Durazo sagði að þeir sem lifðu af væru til meðferðar á sjúkrahúsum í borginni Hermosillo, þar sem sprengingin átti sér stað.
„Ég hef fyrirskipað víðtæka rannsókn til að ákvarða orsakir atviksins og finna þá sem bera ábyrgð,“ sagði hann.
Ríkissaksóknaraembættið sagði í yfirlýsingu að rannsóknin beinist að spennubreyti sem hafi verið inni í versluninni.
„Þegar slökkviliðsmenn leyfa aðgang að byggingunni verður hægt að ákvarða nákvæmlega orsök atviksins,“ sagði í yfirlýsingu frá embættinu.
Sprengingin varð í Waldo’s-verslun í miðborginni.
„Enginn mun standa einn í þessari sorg. Frá fyrstu augnablikum brugðust neyðar-, öryggis- og heilbrigðisþjónustur við af mikilli fagmennsku og eldmóði, náðu stjórn á aðstæðum og björguðu mannslífum,“ sagði ríkisstjórinn.
Claudia Sheinbaum, forseti Mexíkó, sendi samúðarkveðju á Twitter „til fjölskyldna og ástvina þeirra sem létust.“
„Ég hef haft samband við ríkisstjóra Sonora til að veita aðstoð þar sem þörf er á. Ég hef falið innanríkisráðherra, Rosa Icela Rodríguez, að senda stuðningsteymi til að aðstoða fjölskyldurnar og hina særðu,“ bætti hún við.
Mexíkóskir fjölmiðlar sögðu að viðskiptavinir hefðu leitað skjóls inni í versluninni eftir sprenginguna, en lokast þar inni vegna eldsins. Myndir í fjölmiðlum sýndu framhlið byggingarinnar svarta af reyk og glugga brotna.
Yfirvöld hvöttu almenning til að forðast svæðið þar sem sprengingin varð og aflýstu hátíðarhöldum sem átti að halda þann dag í tilefni Día de Muertos, Dags hinna dauðu.
Athugasemdir