Brynjar Níelsson, varaþingmaður Sjálfstæðisflokksins, segir bakslag ríkja víða í samfélaginu um þessar mundir, jafnvel í einkalífi sínu. Þetta kemur fram í nýrri Facebook-færslu hans, sem löðrar af kaldhæðni og húmor.
„Ég þekki ekki þann kima í samfélaginu þar sem ekki er bakslag nú um stundir. Meira að segja er komið verulegt bakslag í hjónaband okkar Soffíu,“ skrifar Brynjar. Hann segir að í síðasta pistli hafi hann greint frá því að hann hefði gefið eiginkonu sinni skartgrip í tilefni af degi elskenda „að amerískum sið“, en að gjöfin hafi ekki fallið í kramið.
„Nú hefur komið í ljós að hana langaði meira í standlampa. Þar að auki telur hún að þeir sem hafa enga tilfinningu fyrir fegurð og stíl eigi ekki að kaupa skartgripi,“ skrifar hann.
Brynjar segir að við leit sína að standlampa á netinu hafi hann rekist á yfirlýsingar ráðherra í ríkisstjórninni um efnahagsmál. Þar hafi komið fram gagnrýni á sérfræðinga hins opinbera. Hann skrifar:
„Meðan ég leita á netinu hvar hægt sé að kaupa góðan standlampa rekst ég reglulega á yfirlýsingar ráðherra í okkar góðu ríkisstjórn um hvað allir sérfræðingar okkar í hagfræði og efnahagsmálum eru fáfróðir, einkum þeir í Seðlabankanum, Fjármálaráðuneytinu og Hagstofunni.“
Að mati Brynjars skorti þessa sérfræðinga skilning á störfum ráðherranna. „Þar misskilja menn eða hreinlega skilja ekki snilld ráðherranna við efnahagsstjórn,“ bætir hann við.
Hann veltir því jafnframt upp hvort spara megi í ríkisrekstri með því að segja þessum sérfræðingum upp.
„Mér sýnist hægt að spara verulega í ríkisrekstri með því að reka þessa fáfróðu hagfræðinga,“ skrifar Brynjar.
Í staðinn stingur hann upp á öðrum lausnum og nefnir bæði einstaklinga og hópa. „Hægt væri að fá Höllu Gunnarsdóttur og Ásgeir Brynjar Torfason, sem eru með þetta skemmtilega og fróðlega hlaðvarp um efnahagsmál, til að vera ríkisstjórninni innan handar fyrir lítinn pening eða deildarforsetann í viðskiptafræði við Háskólinn á Bifröst, sem alls staðar hefur slegið í gegn.“
Athugasemdir