Bruce Campbell greinir frá krabbameini

Leik­ar­inn Bruce Campbell hefur greint frá því að hann sé með krabba­mein sem sé með­höndl­an­legt en ekki lækn­an­legt. Hann greindi frá þessu í skila­boðum til aðdá­enda sinna í gær.

Campbell er meðal ann­ars þekktur fyrir hlut­verk sitt í Evil Dead-kvik­mynda­ser­í­unni.

Hann kvaðst ekki ætla að fara náið út í eðli sjúk­dóms­ins, en tók fram að vinnu­á­ætlun hans myndi taka breyt­ingum á næst­unni. „Við­burðir, ráð­stefnur og vinna almennt þurfa að víkja fyrir með­ferð,“ sagði hann og bætti við að hann hygð­ist ein­beita sér að því að ná eins góðri heilsu og mögu­legt væri yfir sum­arið.

Af þessum sökum hefur Campbell aflýst nokkrum ráð­stefnu- og við­burðum sem áttu að fara fram í sumar. Hann benti á að lækna­með­ferðir og fag­legar skuld­bind­ingar fari ekki alltaf saman.

Þrátt fyrir þetta sagð­ist hann stefna að því að fara í kynn­ing­ar­ferða­lag í haust vegna nýrrar kvik­myndar sinnar, Ernie & Emma, sem hann bæði leikur í og leik­stýrir.

Að lokum lét Campbell fylgja með ákveðin skila­boð til aðdá­enda: hann væri „harð­jaxl“ og ætti von á að vera áfram á meðal þeirra um ókomin ár.