Helgi Magnús Gunnarsson, fyrrum vararíkissaksóknari, hefur fengið málflutningsréttindi fyrir Hæstarétti Íslands en það var Sýslumaðurinn á Norðurlandi eystra sem veitti honum þau.
Helgi hefur verið mikið í umræðunni á undanförnum árum vegna vinnudeilu sem hann stóð í við ríkissaksóknara.
Samkvæmt stjórnarráðinu er forsaga málsins er sú að í júlí 2024 vísaði ríkissaksóknari til þáverandi dómsmálaráðherra, Guðrúnar Hafsteinsdóttur, máli sem varðaði ummæli vararíkissaksóknara á opinberum vettvangi. Taldi ríkissaksóknari vararíkissaksóknara ekki hafa bætt ráð sitt í kjölfar áminningar sem hún hafði veitt honum tveimur árum áður heldur hefði hann aftur sýnt af sér háttsemi sem ekki væri sæmandi embætti hans.
Í rökstuðningi þáverandi dómsmálaráðherra í september 2024 kom fram að ummæli vararíkissaksóknara hefðu verið óviðeigandi og til þess fallin að grafa undir trúverðugleika embættis ríkissaksóknara og ákæruvaldsins í heild. Aftur á móti taldi þáverandi dómsmálaráðherra ekki forsendur til að veita vararíkissaksóknara lausn um stundarsakir.
Eftir þessa niðurstöðu kom ríkissaksóknari því á framfæri við dómsmálaráðuneytið að hann teldi vararíkissaksóknara skorta almenn hæfisskilyrði til að gegna embættinu.
Í kjölfar þess var honum boðið að gerast aðstoðarríkislögreglustjóri en Helgi hafnaði því og er byrjaður að stunda lögfræðistörf.
Athugasemdir