Sóleyju Tómasdóttur hótað af ofbeldismanni

Í pistli sem Sóley Tóm­as­dóttir, fyrrum borg­ar­full­trúi og bar­áttu­kona, birtir á heima­síðu sinni greinir hún frá því að henni hafi borist hótun fyrr í vik­unni en var það gert sím­leiðis.

Setur borg­ar­full­trú­inn fyrr­ver­andi hót­un­ina í sam­hengi við heim­ild­ar­mynd­ina Inside the Manosphere eftir Louis Theroux en myndin hefur vakið mikla athygli á und­an­förum dögum fyrir að sýna fyr­ir­litn­ingu og andúð margra karl­kyns áhrifa­valda í garð kvenna. Sóley tekur reyndar fram að myndin hafi verið „löng og leið­in­leg heim­ild­ar­mynd um það sem svo margar konur hafa áður greint, útskýrt og gagn­rýnt með miklu beitt­ari hætti.“

Opnar hún sig svo um hót­un­ina.

„Aðfara­nótt þriðju­dags vakn­aði ég við sím­hring­ingu úr óþekktu íslensku núm­eri. Eftir að hafa reynt að hundsa lát­lausar hring­ingar og ansi mörg óaðl­að­andi smá­skila­boð var ekk­ert annað í stöð­unni en að ræða við kauða. Við hjónin vorum bæði glað­vöknuð og satt að segja svo­lítið for­vitin um það sem hann hefði að segja. Það reynd­ist hvorki vera fal­legt, upp­byggi­legt eða verð­skuldað,“ skrifar Sóley.

„Ég er orðin svo gömul í þessum bransa að ég varð eig­in­lega ekk­ert hrædd. Stutt leit á net­inu sýndi að mað­ur­inn hefur bæði beitt konur ofbeldi og ofsóknum. Samt upp­lifði ég hann bara sem hálf­gert grey sem er að glíma við heil­mikið mót­læti og ákveður að taka van­líðan sína út í sím­tali við mig,“ heldur hún áfram.

„Það er auð­vitað óþol­andi að ég skuli gera lítið úr ofbeld­inu sem það er að hringja heim til fólks um miðjar nætur til að hóta því og úthúða. Ég veit að mað­ur­inn er hættu­legur. En það er lík­lega ein­hvers­konar „sur­vi­val mek­an­ismi“, enda veit ég að ofbeldi gegn konum er almennt létt­vægt fundið í sam­fé­lag­inu. Bara að ein­hver karl myndi taka það að sér að afhjúpa svona karla. Þá myndi kannski eitt­hvað breyt­ast. Til­raunir okkar kvenna hafa alla­vega ekki virkað.“

Ekki tilviljun

Sóley telur víst að mað­ur­inn sem hót­aði henni sé dyggur aðdá­andi áhrifa­valda mann­hvels­ins sem fjallað var um í mynd­inni og að hann trúi því ein­læg­lega að mót­lætið sem hann glímir við sé Sóleyju og öðrum femínistum að kenna. Þetta birt­ist síðan greini­lega í ung­lingum á Íslandi í dag. Stelpur eigi að vera und­ir­gefnar og strákar ríkir og stæltir.

Hún segir að ekk­ert af þessu sé til­viljun. „Kynja­mis­rétti og kven­fyr­ir­litn­ing hefur alltaf verið vanda­mál, en áhrifa­valdar mann­hvels­ins eru birt­ing­ar­mynd bakslags sem hefur ofan­greind áhrif. Þeir eru ekki bara í útlöndum, enda er inter­netið alþjóð­legt og þeir aldeilis ekki bara útlenskir. Um það hef ég áður skrifað og fullt af öðrum konum líka. Og ein­hverjir karlar, svo allrar sann­girni sé gætt. En það þarf meira til. Við þurfum öll að sporna við þessu rugli. Það er heilt sam­fé­lag í húfi,“ skrifar Sóley að lokum.