Konan sem lést í sprengingu í Bristol á dögunum er sögð hafa sýnt hetjudáð með því að koma barni í öruggt skjól rétt áður en sprengingin varð.
Hin látna, Joanne Shaw, 35 ára, er sögð hafa sagt barninu að fara út í garð og leika sér á trampólíni þegar rifrildi hófst snemma á sunnudagsmorgni.
Nágranni hennar, Stuart Blanchard, sagði að barnið hefði verið úti þegar sprengingin varð. „Hún sagði því líklega að fara út til að komast undan rifrildinu. Ég vaknaði við að hún hrópaði „farðu í burtu, farðu í burtu“ og svo heyrðist mikill hvellur sem skók húsið,“ sagði hann.
Lögregla hefur staðfest að Joanne og fyrrverandi sambýlismaður hennar, Ryan Kelly, 41 árs, létust í sprengingunni. Parið hafði áður komið við sögu lögreglu vegna heimilisofbeldis.
Talið er að Kelly hafi komið að húsinu með handsprengju og sprengt hana við útidyrnar.
Að sögn nágranna hafði Joanne nýlega slitið sambandi við Kelly og flutt til foreldra sinna til að komast undan honum. „Hann kom þangað í miklu uppnámi,“ sagði Blanchard.
Annar nágranni sagði að lögregla hefði reynt að endurlífga Joanne, en neyðarsveitir hafi þurft að hörfa þegar sprengjusérfræðingar komu á vettvang vegna hættu á frekari sprengingum.
Vinir og nágrannar lýsa Joanne sem góðri og hlýlegri manneskju sem hafi ekki átt þetta skilið.
Sprengingin varð um klukkan 6:30 að morgni sunnudags eftir að lögreglu hafði borist tilkynning um heimilisofbeldi skömmu áður.
Lögregla hefur skráð dauða Joanne sem manndráp en segir að ekki sé leitað að öðrum í tengslum við málið. Þá hefur verið tekið fram að ekki sé talið að atvikið tengist hryðjuverkum.
Athugasemdir