Ragnheiður Stephensen grunnskólakennari segir að sífellt stærri hópur foreldra taki skólagöngu barna sinna ekki nægilega alvarlega og að það hafi neikvæð áhrif bæði á námsárangur og skólastarf í heild. Þetta kemur fram í pistli, sem birtist á Vísi, sem hún skrifaði þar sem hún gagnrýnir aukna fjarveru nemenda og minnkandi þátttöku foreldra í námi barna sinna.
Í skrifum sínum bendir Ragnheiður á að skólaskylda sé lögbundin af ástæðu og að tíð leyfi frá skóla, hvort sem um sé að ræða lengri ferðalög eða staka daga, hafi bein áhrif á framvindu náms. „Þjóðirnar í kringum okkur eiga ekki við þetta vandamál að stríða. Þar eru börn ekki stanslaust í leyfi frá skóla, hvort sem er í lengri tíma eða í stökum tímum. Það einfaldlega má ekki og þau fá ekki leyfi. Þar er ekki litið á skóla sem eitthvað sem er fyrir í fjölskyldulífinu. Þar er skóli hluti af fjölskyldulífinu.“
Hún segir að fjarvera nemenda geti einnig haft áhrif á gæði kennslu fyrir þá sem eftir sitja í skólastofunni.
Að hennar mati virðist skólastarf í auknum mæli þurfa að víkja fyrir tómstundum og öðru fjölskyldulífi hjá sumum foreldrum. Hún nefnir sérstaklega að andstaða hafi komið fram við einföld heimaverkefni fyrir yngstu nemendur, sem áður hafi verið talin mikilvæg leið til að efla tengsl foreldra við nám barna sinna.
Hún leggur áherslu á að samvera, samræður og þátttaka foreldra séu lykilatriði í að byggja upp virðingu barna fyrir námi.
Ragnheiður telur einnig að íslenskt samfélag sé orðið of upptekið af hraða og þátttöku í fjölbreyttum verkefnum, á kostnað þess að njóta og fylgja börnum sínum í gegnum skólagönguna.
Að lokum hvetur hún foreldra til að nýta þann mikla aðgang sem þeir hafa í dag að upplýsingum um skólastarf og samskiptum við kennara. Hún segir mikilvægt að foreldrar fylgist með skólagöngu barna sinna og taki virkan þátt í henni.
„Þegar þú velur að eiga barn þá er skólaganga hluti af því og henni þarf að sinna,“ segir Ragnheiður Stephensen.
Athugasemdir