Ákæra hefur verið gefin út á hendur Írisi Helgu Jónatansdóttur vegna fjölda ætlaðra brota, meðal annars umsáturseineltis, skjalafals, hótana, rangra sakargifta, ærumeiðandi ummæla og brota á barnaverndarlögum.
Heimildin greindi frá.
Samkvæmt ákærunni beinast brotin að fjórum fullorðnum einstaklingum og börnum þeirra. Fyrirtaka málsins fer fram í Héraðsdómi Reykjaness á morgun.
Einnig hefur verið ákærður karlmaður, fæddur árið 1979, sem sagður er hafa komið að hluta þeirra atvika sem rannsókn málsins tekur til. Honum er meðal annars gefið að sök að hafa tekið þátt í að níða heimili fjölskyldu sem Íris Helga er sögð hafa beint aðgerðum sínum gegn, meðal annars með því að bera óhreinindi á hurðarhúna og bifreið við heimili fjölskyldunnar. Þolendur krefjast miskabóta sem nema samanlagt rúmum níu milljónum króna.
Í ákærunni eru jafnframt rakin atvik sem tengjast störfum Írisar Helgu við Hraunvallaskóla. Þar er henni gefið að sök að hafa haldið því ranglega fram gagnvart samstarfsfólki og nemendum að Garpur Elísabetarson væri í sambandi við hana og að dóttir hans væri barn hennar eða stjúpbarn.
Þá er henni einnig gefið að sök að hafa borið á þrjá drengi við skólann að þeir hefðu sent dóttur Garps kynferðislegt myndefni. Samkvæmt ákærunni miðlaði hún þeim ásökunum til samstarfskennara sinna, en þegar málið var kannað af stjórnendum skólans hafi komið í ljós að engar sannanir studdu frásögnina.
Athugasemdir