Ólafur Þórarinsson, betur þekktur sem Labbi í Mánum, talar um stjórnmálaástandið á Íslandi og vaxandi hægrisveiflu í heiminum í harðorðri Facebook-færslu sem hann birti eftir sveitarstjórnarkosningarnar.
Í upphafi færslunnar vitnar Labbi í ljóðlínurnar: „Ó flýið þið börn mín til framandi stranda, með fögnuði leitið þið öruggra landa,“ og segir þróunina í samfélaginu vekja með sér miklar áhyggjur.
Hann segir það „sannkallaða þjóðarskömm“ þegar stjórnmálamenn nái fylgi með því að „niðurlægja keppinauta sína“ og lofa um leið að færa auð og eigur almennings til þeirra sem fyrir eigi mest.
„Þau munu nú með auknum völdum hrifsa til sín það sem eftir er til að geta ráðskast með allt okkar stjórnkerfi og þar með koma afrakstri og gróða í eigin hendur, skattaskjól og mútugreiðslur til að kúga enn meira fé út úr þeim sem síst geta varið sig,“ skrifar hann.
Labbi segir valdasýki og gróðafíkn vera að verða ráðandi afl í samfélögum víða um heim og telur að slíkt leiði til hnignunar.
„Þegar valdasýki og gróðafíkn eru drifkraftur samfélaga (frumskógarlögmálið) rotna þau fljótt og sundrast eins og við sjáum í þessari ógnvekjandi hægrisveiflu sem nú breiðist út um heiminn í bland við rasisma,“ skrifar hann.
Þá gagnrýnir hann stjórnarandstöðuna harðlega og segir hana standa „argandi og gargandi til að hindra að lýðræðinu sé framfylgt og virtur sé vilji meirihluta landsmanna.“
Að hans mati hafi stór hluti fólks ekki lært af fyrri mistökum.
„Því miður er þó of stór hluti þeirra eins og ómálga börn sem ekki hafa náð þroska til að læra af mistökum sínum og því eru þau endurtekin aftur og aftur,“ segir Labbi.
Í lok færslunnar dregur hann upp dökka framtíðarsýn þar sem auðugir einstaklingar nái yfirráðum yfir samfélaginu á kostnað almennings.
„Það sorglega er að með uppgangi græðgisaflanna hér munu þau trúlega ná að hrifsa til sín restina af okkar arðbærustu auðlindum og eigum svo ekkert stendur eftir nema kannski fangabúðir auðaflanna (brottfararstöð) til að losa sig við þá sem ekki eru þeim þóknanleg og því tútnar veldi þeirra út meðan innviðir og almannaþjónusta grotnar niður því það þarf að reka hana með endalausri gjaldtöku sem rýrir enn frekar lífsskilyrði þeirra þrautpíndu sem þó standa undir óhófi auðræflanna sem haga hlutunum svona svo þeir geti lækkað eða afnumið álögur á þá sem allt eiga svo landið verði eins og einræðisríki nema með öfugum formerkjum. ,“ skrifar hann að lokum.
Athugasemdir