Einstaklega glæsilegt og vel skipulagt einbýlishús við Lambasel 5 í Seljahverfi Reykjavíkur hefur verið sett á sölu. Um er að ræða eign sem er skráð 238,6 fermetrar að stærð, þar af 210,3 fermetrar íbúðarrými og 28,3 fermetra bílskúr. Að auki fylgir rúmlega 70 fermetra óskráð rými á neðsta palli hússins, sem hefur verið endurnýjað með glæsilegum hætti og býður upp á fjölbreytta nýtingarmöguleika.
Húsið stendur á 702 fermetra fullfrágenginni lóð og er byggt árið 2006. Árið 2015 var eignin endurnýjuð að verulegu leyti og hefur hún síðan verið haldið í afar góðu ástandi.
Eignin er á fjórum pöllum og samtals um 309 fermetrar þegar hið óskráða rými er talið með. Á efsta palli er rúmgott alrými þar sem stofa, borðstofa og eldhús mynda samfellda heild. Þar nýtur sín fallegur arinn, mikil lofthæð og stórbrotið útsýni yfir nærliggjandi svæði.
Í húsinu eru þrjú svefnherbergi, þar af glæsileg hjónasvíta með sér baðherbergi og fataherbergi. Þá er þar einnig setustofa, þrjú baðherbergi auk gestasalernis og rúmgott þvottahús. Útgengt er á sólpalla frá eldhúsi, setustofu, hjónasvítu og þvottahúsi.
Á neðsta palli er rúmgóð og vönduð svíta með sérinngangi, hárri lofthæð, stóru baðherbergi með saunaklefa og opnu alrými. Rýmið býður upp á möguleika til að útbúa aukaíbúð eða nýta sem sjálfstæða gestaaðstöðu.
Mikil áhersla hefur verið lögð á efnisval og frágang. Hiti er í öllum gólfum, eldhústæki eru frá Miele og sérsmíðaðar innréttingar eru víða um húsið. Borðplötur í eldhúsi og baðherbergjum eru úr steini frá Fígaró.
Garðurinn er einstaklega snyrtilegur með viðarpöllum á þrjá vegu, fallegri lýsingu, heitum potti og útisturtu. Fyrir framan bílskúrinn eru upphituð bílastæði sem auka þægindi í daglegu lífi.
Húsið kostar 238.000.000 krónur.
Athugasemdir