Héraðsdómur Reykjaness hefur dæmt Sævar Eyvinds Helgason í fjögurra mánaða skilorðsbundið fangelsi fyrir fjárdrátt vegna vangoldinna lífeyrisiðgjalda starfsmanna fyrirtækis sem hann stýrði á árunum 2019 og 2020.
Samkvæmt dómnum hélt fyrirtækið eftir samtals 13,7 milljónum króna af launum starfsmanna sem áttu að renna til Gildis lífeyrissjóðs. Sævar, sem var stjórnarmaður og hafði prókúruumboð fyrir félagið, stóð ekki skil á fjárhæðinni heldur var hún nýtt í rekstur fyrirtækisins.
Sævar játaði brotið skýlaust fyrir dómi og samþykkti jafnframt bótakröfu Gildis lífeyrissjóðs.
Dómurinn kveður á um að Sævar skuli greiða Gildi lífeyrissjóði 13,6 milljónir króna ásamt dráttarvöxtum. Þá var honum gert að greiða 250 þúsund krónur í málskostnað vegna bótakröfunnar auk verjandalauna.
Við ákvörðun refsingar leit dómurinn meðal annars til þess að Sævar hafði áður hlotið dóm fyrir skattalagabrot árið 2017. Brotin sem nú var dæmt fyrir voru að stórum hluta framin á skilorðstíma þess dóms. Hins vegar taldi dómurinn að verulegur dráttur hefði orðið á rannsókn og málsmeðferð án þess að ákærði bæri ábyrgð á honum.
Af þeim sökum var ákveðið að fresta fullnustu fangelsisrefsingarinnar. Refsingin fellur niður að ári liðnu haldi Sævar almennt skilorð á þeim tíma.
Athugasemdir