Kristinn Hrafnsson, ritstjóri WikiLeaks, gagnrýnir nýopnaða gyðingamenningarmiðstöð við Hverfisgötu harðlega í Facebook-færslu sem hann birti í kjölfar umfjöllunar Heimildarinnar um fjármögnun miðstöðvarinnar. Kristinn hafði í síðustu viku óskað eftir svörum hvað varðaði hina nýju menningarmiðstöð gyðinga á Hverfisgötunni.
Í færslunni gerir Kristinn meðal annars athugasemdir við að einn helsti styrktaraðili miðstöðvarinnar sé rússneski auðmaðurinn Eugene Shvidler, sem sætt hefur refsiaðgerðum í Bretlandi.
„Mikil er guðsblessunin fyrir land og þjóð að fá loks gyðinglega ,,menningarmiðstöð” sem aðallega er fjármögnuð af manni á svartlista russnesskra óligarka í Bretlandi hvar lúxusfasteignir, einkaþota og aðrar eigur hafa verið frystar. Shvidler fann samt aur til að styrkja miðstöðina með slíkum rausnarskap að hún er nefnd eftir honum.“
Kristinn gagnrýnir einnig Chabad-Lubavitch-hreyfinguna, sem rekur miðstöðina, og tengir hana við afstöðu til landnáms Ísraela á hernumdum svæðum.
„Miðstöðin er svo rekin af sértrúarhreyfingu innan gyðingdóms en andlegur guðfaðir hennar til áratuga var alltaf gallharður á því að herteknum svæðum Ísraela 1967 yrði aldrei skilað. Ekki að undra þó að kollegi íslenska rabbínans, sá sem leiðir systurstofnunina í Hebron, hafi verið í fylgdarliði Ben-Gvir í heimsókn hans til New York fyrir ári (þar sem hann vísiteraði höfuðstöðvar Chabad-Lubavitch hreyfingarinnar í Brooklyn).“
Þá gerir hann einnig athugasemdir við viðtökur sem miðstöðin fékk við opnun hennar og nefnir sérstaklega íslenska ráðamenn sem sendu árnaðaróskir eða voru viðstaddir.
„Árnaðaróskum ringdi yfir miðstöðina við opnun frá Jóni Gnarr (sem mætti), Þórunni forseta þings, Kristrúnu forsætisráðherra og Hildi borgarstýru. Þess er getið að starfandi sendiherra Bandaríkjanna hafi mætt við opnunina en aðrir diplómatar virðast ekki hafa mætt, ekki einu sinni danski sendiherrann sem þó er nú næsti nágranni rússnesku óligarkamiðstöðvarinnar.“
Færslan kemur í kjölfar fréttar Heimildarinnar þar sem fjallað var um fjármögnun og tengsl nýju gyðingamenningarmiðstöðvarinnar, sem hefur vakið nokkra umræðu undanfarna daga.
Svör rabbínans
Mannlíf heyrði í Kristni og spurði hann sérstaklega út í svör rabbínans Avraham Feldman, sem fer fyrir menningarmiðstöðinni, við spurningum Heimildarinnar, um afstöðu hans til Gaza og tengsl við Ísrael en spurningarnar hljóðuðu á eftirfarandi máta:
Hefur miðstöðin einhver bein eða óbein tengsl við Ísrael? Hefur Chabad-Lubavitch hreyfingin einhver bein eða óbein tengsl við Ísrael? Hver er afstaða rabbínans til stríðsins í Palestínu?
Svör rabbínans voru:
„Tilgangurinn með menningarhúsi gyðinga er að þjóna samfélaginu á staðnum. Við erum ekki hér til að vera fulltrúar annarra landa. Markmið okkar er að vera hluti af samfélaginu og leggja okkar af mörkum á hvaða jákvæðan hátt sem við getum. Sem aðalrabbíni á Íslandi er hlutverk mitt að þjóna samfélaginu á staðnum. Ég er ekki fulltrúi Ísraels né tala fyrir neina ríkisstjórn. Ég einbeiti mér að mennta-, menningar- og samfélagsstarfi. Við biðjum daglega fyrir varanlegum friði og fyrir öryggi og velferð allra saklausra einstaklinga. Markmið Chabad Lubavitch er að gefa öllum tækifæri til að kanna og fagna gyðinglegri arfleifð sinni og tengjast gyðinglegri sjálfsmynd sinni. Þetta var það sem Lubavitcher-rabbíninn (rabbíninn Menachem Schneerson 1902-1994) barðist fyrir og við erum innblásin af þeirri sýn og umhyggju sem hann sýndi hverjum einstaklingi, bæði gyðingum og öðrum. Við leggjum áherslu á að þjóna staðbundnu gyðingasamfélagi, sem og að miðla gyðinglegri menningu og menntun til almennings. Í húsinu opnum við brátt „Safn um líf gyðinga á Íslandi“, sem verður fastasýning á sögulegum ljósmyndum, skjölum og sögum sem spanna meira en 100 ára gyðingalíf. Þetta verður frábær leið fyrir Íslendinga til að læra um hvernig íslensk saga og gyðinga saga skarast á einstakan hátt, sem og að læra um líf gyðinga á Íslandi í dag.“
Kristinn gaf Mannlífi stutt en hnitmiðað svar, um svör rabbínans:
„Þarna er engu svarað.“
Athugasemdir