Lögmaðurinn Eva Hauksdóttir fer hörðum orðum um meðferð stjórnvalda og dómskerfisins á máli Skúla Tómasar Gunnlaugssonar læknis í grein sem hún birti á Vísi í gær. Hún segir að framganga ríkisvaldsins hafi verið „með ólíkindum“ og lýsir yfir alvarlegum efasemdum um stöðu réttarríkisins.
„Framganga ríkisvaldsins í þessu máli hefur verið með ólíkindum. Hvort sem litið er til löggjafans, framkvæmdarvalds eða dómsvalds, hafa viðbrögðin við máli lífslokalæknisins verið slík að ég stórefast um að við ráðum við það verkefni að halda uppi réttarríki,“ skrifar Eva en hún er dóttir Dönu Jóhannsdóttur, en Skúli Tómas var ákærður fyrir að hafa valdið dauða hennar árið 2019, þegar hún fór í hvíldarinnlögn á Heilbrigðisstofnun Suðurnesja.
Hún gagnrýnir meðal annars embætti landlæknis fyrir að hafa aðeins svipt Skúla lækningaleyfi í 15 vikur þrátt fyrir niðurstöður rannsóknar embættisins og bendir á að hann hafi síðar fengið fullt starfsleyfi á ný á meðan lögreglurannsókn stóð enn yfir.
Eva gagnrýnir einnig Landspítalann fyrir að hafa ráðið Skúla til starfa á meðan hann var til rannsóknar vegna gruns um manndráp.
„Skúli vann á Landspítalanum allt þar til héraðssaksóknari ákærði hann fyrir manndráp af ásetningi þann 30. mars síðastliðinn. Þá var hann sendur í frí en er nú kominn aftur til starfa,“ skrifar hún.
Þá segir hún heilbrigðisráðherra og Alþingi hafa brugðist tækifæri til að styrkja lagaramma um öryggi sjúklinga. Hún gagnrýnir jafnframt lögreglu og embætti héraðssaksóknara fyrir langa málsmeðferð og skort á upplýsingagjöf til aðstandenda.
Eva beinir einnig spjótum sínum að Héraðsdómi Reykjaness, sem vísaði málinu frá á þeim grundvelli að Skúli hefði þegar sætt refsikenndum viðurlögum með málsmeðferð landlæknis.
„Þegar niðurstaðan virðist fráleit er það vísbending um að forsendurnar séu rangar,“ skrifar hún og segir dómarann hafa dregið „víðáttuvitlausar ályktanir“ af fordæmum Mannréttindadómstóls Evrópu.
Eva telur líklegt að Landsréttur muni snúa þeirri niðurstöðu við.
„Þegar Landsréttur hefur skoðað málið er líklegast að undið verði ofan af ruglinu og málið sent heim í hérað til efnislegrar meðferðar,“ skrifar hún.
Að lokum bendir Eva á að dómarinn í máli Skúla sé varaformaður siðanefndar Læknafélags Íslands.
„Þess má geta að dómarinn sem vísaði málinu frá héraðsdómi er varaformaður siðanefndar Læknafélags Íslands, félags sem Í nóvember 2021 lýsti yfir stuðningi við umræddan sakborning sem var til lögreglurannsóknar vegna gruns um fjölda manndrápa í starfi.“
Skúli Tómas Gunnlaugsson hefur hafið störf á ný á Landspítalanum eftir að Héraðsdómur Reykjaness vísaði manndrápsmálinu gegn honum frá dómi. Héraðssaksóknari hefur kært frávísunarúrskurðinn til Landsréttar.
Athugasemdir