Breska lögreglan hefur handtekið fimm einstaklinga í bænum Thetford í austurhluta Englands eftir þrjú kvöld í röð þar sem mótmælendur beindu sjónum sínum að húsnæði sem þeir töldu hýsa hælisleitendur. Lögregla þurfti í nokkrum tilfellum að flytja íbúa húsanna á brott til að tryggja öryggi þeirra.
Mótmælin stóðu yfir frá þriðjudegi til fimmtudags og tengjast fyrirætlunum um að nýta yfirgefna herstöð í nágrenni Thetford sem húsnæði fyrir hælisleitendur.
Paul Sanford, lögreglustjóri Norfolk, sagði í samtali við BBC Radio 4 að mótmælendur hefðu beint aðgerðum sínum að byggingum sem þeir töldu tengjast gistingu hælisleitenda. Í að minnsta kosti tveimur tilfellum hefði lögregla þurft að fylgja íbúum húsanna á öruggan stað. Sumir þeirra hefðu verið hælisleitendur.
Samkvæmt The Guardian tóku meira en hundrað manns þátt í mótmælunum á þriðjudag og miðvikudag eftir að listi yfir heimilisföng, sem sögð voru tengjast húsnæði hælisleitenda, fór í dreifingu á netinu.
Lögregla greindi jafnframt frá því að lögreglumaður hefði orðið fyrir grjótkasti, annar verið bitinn og hrækt hafi verið á þriðja.
Myndskeið sem birt hafa verið á samfélagsmiðlum sýna lögreglu fylgja fólki frá húsum á meðan tugir mótmælenda hrópa meðal annars að það eigi að fara og að flóttafólk sé ekki velkomið.
Sanford sagði miklar líkur á því að mótmælendur hefðu komist inn í eitt húsanna og stofnað öryggi íbúa þess í hættu ef lögregla hefði ekki gripið inn í.
Bresk stjórnvöld hafa undanfarin misseri leitað leiða til að draga úr notkun hótela sem húsnæðis fyrir hælisleitendur á meðan umsóknir þeirra eru afgreiddar. Fyrirætlanir um nýtt húsnæði hafa ítrekað leitt til mótmæla.
Sambærileg ólga varð í Belfast á Norður-Írlandi í júní, þar sem ráðist var gegn fólki af erlendum uppruna og húsnæði sem talið var tengjast innflytjendum.
Athugasemdir