Siðanefnd Blaðamannafélags Íslands hefur vísað frá kæru en það var Kristinn Fjeldsted Guðnason sem lagði hana fram á hendur mbl.is vegna fréttar sem birtist á miðlinum í apríl árið 2023. Nefndin taldi kæruna ekki uppfylla skilyrði málsmeðferðarreglna.
Kæran laut að frétt mbl.is frá 13. apríl 2023 sem bar fyrirsögnina „Dæmdir fyrir ofbeldi og að neyða mann ofan í Elliðaár“. Kristinn taldi umfjöllunina fela í sér brot gegn 3. grein siðareglna blaðamanna þar sem ekki hefði verið orðið við beiðni hans um leiðréttingu.
Kristinn hélt því fram að rangfærsla væri í fréttinni sem ekki hefði fengist leiðrétt. Þá gerði hann athugasemd við nafnbirtingu og sagði nafn sitt ekki koma fram í þeim dómi sem fréttin byggðist á.
Í tölvupósti sem hann sendi ritstjórn mbl.is óskaði hann eftir því að nafn hans yrði fjarlægt úr fréttinni. Vísaði hann meðal annars til þess að hvorki DV né RÚV hefðu birt nöfn þeirra sem dæmdir voru í málinu.
Kæran barst skrifstofu Blaðamannafélagsins 13. júlí síðastliðinn. Kristni var degi síðar bent á að annmarkar væru á kærunni með hliðsjón af málsmeðferðarreglum siðanefndar. Hann óskaði engu að síður eftir því að nefndin úrskurðaði um málið án þess að kæran yrði lagfærð.
Kristinn hélt því fram að hið meinta brot væri viðvarandi þar sem fréttina væri enn að finna á netinu. Þá sagði hann ástæðu þess hversu seint kæran hefði verið lögð fram vera að hann hefði ekki vitað fyrr að honum væri unnt að gera athugasemd við birtinguna.
Siðanefnd benti hins vegar á að kærur þyrftu að berast innan tveggja mánaða frá birtingu þess efnis sem kvartað væri undan. Fréttin hefði birst í apríl 2023 og væri kærufresturinn því löngu liðinn. Þá hefði hvorki afrit af fréttinni né vefslóð hennar fylgt kærunni.
Nefndin komst því að þeirri niðurstöðu að kæran fullnægði ekki málsmeðferðarreglum vegna meintra brota á siðareglum Blaðamannafélags Íslands.
Málinu var því vísað frá.
Athugasemdir