Áformum um lagningu nýs rafstrengs milli Bretlands og Írlands var breytt eftir að hundruð Harry Potter-aðdáenda mótmæltu því að strengurinn ætti að liggja um svokallaða gröf húsálfsins Dobby á strönd í Wales en greint er frá þessu í The Guardian
Um er að ræða Greenlink-rafstrenginn, sem kostar um 430 milljónir punda og tengir raforkukerfi Bretlands og Írlands. Upphaflega stóð til að strengurinn, sem er um 200 kílómetra langur, yrði lagður í jörðu við Freshwater West-ströndina í Pembrokeshire.
Ströndin er vel þekkt meðal aðdáenda Harry Potter-myndanna en þar var atriði í Harry Potter and the Deathly Hallows tekið upp þar sem Dobby er lagður til hinstu hvílu.
Simon Ludlam, verkefnastjóri Greenlink, segir að mikil viðbrögð hafi orðið eftir að hann sýndi fyrirhugaða legu strengsins í sjónvarpsviðtali við BBC. Hundruð símtala hafi borist frá aðdáendum sem óttuðust að framkvæmdin myndi raska „gröf“ Dobby.
Ludlam kveðst sjálfur ekki hafa vitað hver Dobby væri og í fyrstu átt erfitt með að skilja hvers vegna málið vakti svo sterk viðbrögð. Starfsfélagi hans hafi hins vegar gert honum ljóst að aðdáendur tækju málið mjög alvarlega.
Í kjölfarið var ákveðið að endurskoða legu strengsins og fundin ný leið fram hjá staðnum. Ludlam sagði verkefnið nú halda áfram án þess að „gröf“ Dobby yrði raskað.
Hann benti jafnframt á að nýja leiðin lægi nærri raunverulegum fornleifum frá bronsöld, meðal annars duftkerjum sem tengjast greftrunum, en þeim hefði einnig verið hlíft.
National Trust, sem fer með umsjón strandarinnar, hefur áður beðið Harry Potter-aðdáendur um að skilja ekki eftir steina og aðra muni við „gröfina“, enda sé svæðið viðkvæmt frá náttúruverndarsjónarmiði.
Athugasemdir