Yfir 280 manns hafa verið handteknir í Grikklandi það sem af er ári vegna brota sem tengjast eldsvoðum. Landið er áfram í mikilli viðbragðsstöðu vegna hættu á skógareldum.
Gríska slökkviliðið greindi frá því á miðvikudag að alls hefðu 281 verið handtekinn frá áramótum. Þar af voru 252 handteknir vegna elda sem taldir eru hafa kviknað vegna gáleysis en 29 vegna gruns um íkveikju af ásetningi.
Handtökunum hefur fækkað frá síðustu tveimur árum. Á sama tímabili árið 2024 voru 360 handteknir vegna eldsvoða og 315 árið 2025. Grísk stjórnvöld hafa á undanförnum árum hert verulega viðurlög við íkveikjum. Þeir sem verða fundnir sekir um að hafa kveikt elda geta nú átt yfir höfði sér allt að 20 ára fangelsi og sektir sem nema allt að 200 þúsund evrum.
Mikil hætta er enn á skógareldum víða um Grikkland. Nýverið eyðilagði umfangsmikill eldur meira en 11 þúsund hektara af furuskógi, kjarrlendi og ræktarlandi nærri strandbæ norðvestur af Aþenu. Vegna hvassviðris tók fimm daga að ná tökum á eldinum.
Á miðvikudag var 59 ára maður handtekinn í Þessalóníku vegna gruns um aðild að meira en fimm eldsvoðum á tveggja vikna tímabili. Þá var 33 ára maður handtekinn á Aþenusvæðinu á þriðjudag eftir að hafa kveikt upp í færanlegu grilli á skóglendi. Hann var sektaður um þrjú þúsund evrur.
Athugasemdir