Mannlíf hefur fengið áreiðanlegar heimildir um að hópur ísraelskra ferðamanna, sem fullyrt er að séu hermenn, hafi sýnt ógnandi tilburði, haft í hótunum og skemmt muni á palestínsku kaffihúsi í Keflavík.
Atvikið átti sér stað í dag, laugardaginn 15. ágúst 2026, á veitingastaðnum Lava Sweets & Cafe við Hafnargötu. Samhliða ógnandi tilburðum er kaffihúsið sagt standa frammi fyrir skipulagðri netárás sem miðar að því að eyðileggja orðspor þess.
Málið komst í hámæli rétt í þessu eftir að Ahmed Jenin birti opinbera færslu á Facebook-síðu sinni þar sem hann lýsir atburðarásinni og kallar eftir tafarlausum viðbrögðum frá íslenskum yfirvöldum og lögreglu.
Hótanir og skemmdarverk á staðnum
Samkvæmt frásögn Ahmeds Jenin mætti hópurinn inn á Lava Sweets & Cafe, sem er í eigu palestínskra hjóna sem flúðu stríðsátök og hófu rekstur í Reykjanesbæ.
„Í dag, 15. ágúst, fór hópur ísraelskra hermanna sem ferðamenn inn í fyrirtæki í eigu Palestínumanns í Keflavík, Lava Sweets & Cafe. Þeir hótuðu starfsmanninum sem vinnur þar, tóku mynd niður af veggnum og beindu að honum móðgandi og særandi orðbragði,“ skrifar Ahmed.
Hann bætir því við að framkoma hópsins hafi verið skýr og markviss tilraun til þess að hræða starfsfólkið: „Það sem gerðist virtist vera ekkert minna en hótun og skýr ógn.“
Auk atviksins inni á sjálfu kaffihúsinu segir Ahmed að hópurinn hafi fært herferð sína yfir á netið í því skyni að valda rekstrinum fjárhagslegu og samfélagslegu tjóni. Lava Sweets & Cafe hefur hingað til notið mikilla vinsælda og fengið framúrskarandi dóma á netinu.
Ahmed skorar á almenning á Íslandi að sýna samstöðu og bregðast við áreitinu: „Ég vona að allir muni styðja þetta fyrirtæki með því að fara á Google og skilja eftir jákvæða umsögn, svo að þetta áreiti nái ekki að skaða fyrirtækið eða viðveru þess á netinu.“
Kallað eftir viðbrögðum lögreglu og stjórnvalda
Ahmed lýsir yfir þungum áhyggjum af þróun mála á Íslandi og segir þetta atvik ekki vera einsdæmi. Hann fullyrðir að fjölmargir einstaklingar af palestínskum uppruna eða stuðningsmenn þeirra hafi mátt þola skipulagðar hótanir undanfarið.
„Spurningin núna er einföld: Munu íslenska lögreglan og ríkisstjórnin taka þessar hótanir alvarlega? Margir á Íslandi hafa nýlega fengið hótanir frá Ísraelum og hafa hundruð hótunarskilaboða borist mismunandi fólki hér á Íslandi. Hversu margar viðvaranir þarf áður en yfirvöld átta sig á því að þetta er gengið of langt?“
Hann lýsir þó enn yfir trausti á íslensk lögregluyfirvöld en brýnir fyrir þeim að grípa inn í áður en ástandið stigmagnast enn frekar: „Við treystum íslensku lögreglunni og vonum innilega að hún muni taka þessum hótunum gegn svona mörgu fólki mun alvarlegar áður en einhver slasast og áður en það verður of seint. Vegna þess að þetta má ekki verða eðlilegt á Íslandi.“
Undir lok færslunnar gagnrýnir Ahmed einnig áherslur í umræðunni um landamæraeftirlit hér á landi og spyr hvers vegna ekki sé fylgst betur með þeim sem hingað koma í þeim tilgangi einum að áreita aðra.
„Ábyrgðin á því að vernda fólk og koma í veg fyrir hótanir og ógnanir liggur hjá yfirvöldum [...] Hvar er allt fólkið sem kallar alltaf eftir hertu landamæraeftirliti?! Eða á það bara við þegar kemur að innflytjendum og flóttafólki?! Takið þessum hótunum alvarlega. Grípið til aðgerða núna, áður en eitthvað gerist sem ekki verður aftur tekið.“
Ekki liggur fyrir á þessari stundu hvort lögreglan á Suðurnesjum hafi verið kölluð til vegna málsins eða hvort formleg kæra hafi verið lögð fram en Mannlíf fylgist náið með framvindu mála.
Athugasemdir