Bandarískur alríkisdómari hafnaði á þriðjudag kröfu Ghislaine Maxwell um að sakfelling hennar fyrir kynferðisbrot og mansal yrði felld úr gildi. Maxwell var náinn samstarfsmaður Jeffrey Epstein, sem var sakaður um umfangsmikil kynferðisbrot gegn stúlkum.
Maxwell, sem er 64 ára, afplánar 20 ára fangelsisdóm eftir að hafa verið sakfelld árið 2021 fyrir að útvega Epstein stúlkur undir lögaldri. Hún er eina manneskjan sem hefur verið sakfelld fyrir brot í tengslum við Epstein.
Paul Engelmayer, alríkisdómari í New York, sagði í úrskurði sínum að fullyrðingar Maxwell um að brotið hefði verið gegn stjórnarskrárvörðum réttindum hennar við réttarhöldin og ákvörðun refsingar væru haldlausar. Sagði hann þær allar, eða nær allar, fráleitar.
Maxwell hafði áður reynt að fá sakfellingunni hnekkt. Hæstiréttur Bandaríkjanna hafnaði í október síðastliðnum að taka áfrýjun hennar til meðferðar.
Málið hefur áfram verið mikið til umfjöllunar í Bandaríkjunum. Stjórnvöld Donalds Trump forseta hafa birt umfangsmikið safn rannsóknargagna tengdum Epstein eftir lagasetningu á síðasta ári.
Maxwell var kölluð fyrir eftirlitsnefnd fulltrúadeildar Bandaríkjaþings í febrúar til að svara spurningum um tengsl sín við Epstein en neitaði að svara. Lögmaður hennar sagði þá að hún myndi aðeins tjá sig ef Trump veitti henni náðun.
Epstein lést í fangaklefa í New York árið 2019 á meðan hann beið réttarhalda vegna ákæra um kynferðisbrot og mansal.
Athugasemdir