Breski raðmorðinginn John Sweeney, sem var þekktur undir nafninu „skurðamorðinginn“ (e. the canal killer), er látinn 69 ára að aldri. Hann lést úr krabbameini á HMP Whitemoor fangelsinu í Cambridgeshire þann 14. ágúst, samkvæmt frétt breska blaðsins The Times. Sweeney tók leyndarmálið um afdrif höfuð fórnarlamba sinna með sér í gröfina.
Hrottaleg morð og limlestingar
Sweeney hlaut lífstíðardóm árið 2011 fyrir að myrða tvær fyrrverandi kærustur sínar, þær Melissu Halstead og Paulu Fields. Hann bútaði lík þeirra niður og fleygði líkamshlutunum í skipaskurði í Lundúnum og Hollandi:
Melissa Halstead (33 ára) var bandarísk fyrirsæta sem Sweeney myrti árið 1990. Líki hennar var hent í skurð í Rotterdam. Hún var ekki auðkennd fyrr en 18 árum síðar með DNA-tækni. Höfuð hennar og hendur hafa aldrei fundist.
Líkamsleifar Paula Fields (31 árs) fundust í sex ferðatöskum í Regent's-skurðinum í Lundúnum árið 2001. Höfuð, hendur og fætur hennar hafa aldrei fundist.
Saksóknarar sögðu á sínum tíma að Sweeney, sem var húsasmiður, hefði vísvitandi fjarlægt höfuð og hendur kvennanna til að gera lögreglu ókleift að bera kennsl á þær. Á heimili hans fundust hrollvekjandi málverk og ljóð þar sem hann montaði sig af ofbeldisverkum og kallaði sig „Hársvörðasafnarann“ (e. the Scalp Hunter).
Komst upp um hann eftir axarárás
Sweeney var ekki tengdur við hvarf kvennanna fyrr en hann var handtekinn fyrir lífshættulega axarárás á þriðju kærustuna, hjúkrunarfræðinginn Delia Balmer.
Balmer lifði árásina af eftir að nágranni kom henni til bjargar. Sweeney hafði áður haldið henni fangaðri í viku, bundið hana við rúm og beitt hana grófu ofbeldi. Balmer skrifaði síðar endurminningabók um skelfinguna, sem sjónvarpsstöðin ITV aðlagaði í þáttaröðina Until I Kill You árið 2024.
Grunaður um fleiri morð
Lögreglan óttast að fórnarlömb Sweeneys séu fleiri. Enn er lýst eftir tveimur suður-amerískum konum sem voru í sambandi við hann seint á tíunda áratugnum og hurfu sporlaust. Lögreglan veit aðeins skírnarnöfn þeirra, Irani frá Brasilíu og Maria frá Kólumbíu og vinnur með ræðismannsskrifstofum að því að hafa uppi á þeim.
Talsmaður bresku fangelsismálastofnunarinnar segir að embætti umboðsmanns fanga rannsaki nú andlát Sweeneys, eins og lög gera ráð fyrir þegar fangar deyja í haldi.
Athugasemdir