Stytta af bandaríska öfgahægri aðgerðasinnanum Charlie Kirk, sem stendur fyrir utan höfuðstöðvar Turning Point USA, var skemmd með rauðri málningu aðfaranótt sunnudags.
Á ljósmyndum sem samtökin birtu má sjá rauða málningu yfir andliti og hálsi styttunnar auk þess sem fýlusvipur hafði verið málaður framan á hana.
Turning Point USA, samtök sem Kirk stofnaði og urðu ein áhrifamestu samtök bandarískra hægri manna, segjast nú fara yfir upptökur úr öryggismyndavélum og vinna með lögreglu að því að bera kennsl á þá sem stóðu að skemmdarverkunum.
Samtökin segjast ætla að gera við styttuna og endurnýja skiltin sem voru skemmd. Í yfirlýsingu þeirra voru skemmdarverkin kölluð „djöfulleg“ og sagt að hið illa sofi aldrei.
Erika Kirk, ekkja Charlie Kirk, brást einnig við skemmdarverkunum og sagði þau ekki munu hafa tilætluð áhrif. Hún sagði eiginmann sinn ávallt hafa lagt áherslu á að byggja meira upp þegar aðrir reyndu að rífa niður.
„Þau héldu að byssukúla myndi þagga niður rödd eiginmanns míns en hún gerði hana aðeins háværari,“ skrifaði Erika. Sagði hún rauðu málninguna sömuleiðis aðeins verða til þess að arfleifð hans næði til fleiri.
Charlie Kirk var skotinn til bana árið 2025. Hann var áberandi og umdeildur öfgahægri maður í bandarískum stjórnmálum og stofnandi Turning Point USA. Eftir dauða hans hafa stuðningsmenn hans víða um Bandaríkin komið upp minningarreitum og staðið fyrir viðburðum honum til heiðurs.
Athugasemdir