Nýr grunn- og leikskóli hefur verið tekinn í notkun í afskekkta þorpinu Macca í Pujehanhéraði í Síerra Leóne, á vegum Barnaheilla – Save the Children á Íslandi. Um 300 börn sækja nú nám í skólanum, en þau höfðu áður lítil sem engin tök á skólagöngu. Verkefnið var alfarið fjármagnað með framlögum íslensks almennings og Heillavina samtakanna.
Bætt hreinlæti og aðgengi að vatni
Ákvörðun um byggingu skólans var tekin eftir vettvangsferð samtakanna á svæðið á síðasta ári, en Pujehan er eitt fátækasta hérað Síerra Leóne. Samhliða skólastarfinu var borað eftir vatni til að setja upp hreinlætisaðstöðu og salerni fyrir börnin. Nýr vatnsbrunnur við skólann mun jafnframt nýtast öllum íbúum þorpsins og nágrennis.
„Það kom í ljós að börnin í Macca höfðu enga skólabyggingu og það vantaði almennilegan vatnsbrunn og salerni,“ segir Tótla I. Sæmundsdóttir, sem var viðstödd vígsluna.
„Það var mögnuð stund þegar við hittum fólkið í þorpinu og fórum með börnunum í nýja skólann þeirra. Ég er eiginlega bara orðlaus af stolti.“
Framlag almennings og tónlistarfólks skilaði árangri
Framkvæmdir hófust í upphafi árs og lauk þeim í ágúst. Skólinn var svo vígður við hátíðlega athöfn þann 7. september síðastliðinn.Verkefnið sýnir glögglega samstöðu íslensks samfélags, en fjármögnunin tryggðist meðal annars með:
- Mánaðarlegum framlögum Heillavina Barnaheilla.
- Tvennum styrktartónleikum fimm barnakóra (Dalskóla, Ingunnarskóla, Vogaskóla, Rimaskóla og Lindaskóla) undir stjórn Jónu Halldórsdóttur í vor.
- Stórtónleikum í Salnum í Kópavogi í september þar sem Mugison, Ellen Kristjánsdóttir, KK, Ragnheiður Gröndal og Pétur Ben gáfu vinnu sína og rann miðasalan óskert til verkefnisins.
Starfið útvíkkað eftir framúrskarandi árangur
Barnaheill hafa starfað í héraðinu frá árinu 2021 og nær verkefnið nú til 87 samfélaga. Sjónum er einkum beint að fræðslu, menntun og ofbeldisforvörnum. Óháð úttekt sýndi fram á framúrskarandi árangur samtakanna við að útrýma ofbeldi á svæðinu síðustu fimm ár, og var starfið því útvíkkað til fleiri þorpa þegar seinni hluti verkefnisins hófst fyrr á þessu ári.
Athugasemdir