Kona fann ókunnugt lík í kistu móður sinnar

Kona í Detroit í Banda­ríkj­unum krefst svara eftir að í ljós kom að lík ann­arrar konu hafði verið lagt í kistu sem fjöl­skylda hennar taldi geyma lík móður hennar.

Kimberley Moore lést nýverið í Michigan og hafði hún skilið eftir ítar­leg fyr­ir­mæli um hvernig hún vildi að útför sinni yrði háttað. Fjöl­skylda hennar, þar á meðal dóttir hennar Bianca, tók að sér að ganga frá útför­inni í sam­ræmi við óskir hennar.

Áður en form­leg kistu­lagn­ing fór fram fór Bianca á Hutchinson Funeral Home í Detroit til að sjá lík móður sinnar. Þegar hún leit á kon­una í kist­unni átt­aði hún sig hins vegar á því að þar lá ekki móðir hennar.

Bianca sagði í sam­tali við Fox 10 News að það hefði ekki verið and­lit kon­unnar sem vakti fyrst grun­semdir hennar heldur fætur hennar. Móðir hennar hefði verið með áber­andi fæð­ing­ar­blett á fæti sem ekki var að finna á kon­unni í kist­unni.

„Ég horfði á fæt­urna og sá ekki fæð­ing­ar­blett­inn sem mamma var með. Ég leit á mann­inn og sagði: Herra, þetta er ekki mamma mín,“ sagði Bianca.

Að hennar sögn svar­aði starfs­maður útfar­ar­stof­unnar því til að mis­tök hefðu mögu­lega orðið til þess að móðir hennar hefði verið brennd einni eða tveimur vikum áður.

Fjöl­skyldan reynir nú að kom­ast að því hvað varð um lík Kimberley og hvar aska hennar kunni að vera. Bianca vill jafn­framt að konan sem fannst í kist­unni verði borin kennsl á svo aðstand­endur hennar geti fengið tæki­færi til að kveðja hana.

Hutchinson Funeral Home hefur beðist afsök­unar á mál­inu og hafið innri rann­sókn.

„Við erum harmi slegin og inni­lega miður okkar vegna þess sem fjöl­skylda Moore hefur þurft að ganga í gegnum. Við höfum hafið eigin innri rann­sókn til að kom­ast nákvæm­lega að því hvað gerð­ist og munum bregð­ast við í sam­ræmi við nið­ur­stöð­urnar,“ segir í yfir­lýs­ingu útfar­ar­stof­unnar.